Eńbek jáne halyqty áleýmettik qorǵaý mınıstri Tamara Dúısenova Parlament Májilisinde ótken úkimet saǵatynda depýtattarǵa Áleýmettik kodekstiń jobasyn tanystyrdy, dep habarlaıdy Egemen.kz vedomstvonyń baspasóz qyzmetine silteme jasap.
«Besinshi novella – bul jańa kóshi-qon saıasaty. Onyń maqsaty – Qazaqstan ekonomıkasyn suranysqa ıe jáne bilikti kadrlarmen qamtamasyz etý. Jańa kóshi-qon saıasaty 4 mindetti sheshýdi kózdeıdi: suranysqa ıe kadrlardy tartý; ınvestısııa tartý; shetelde turatyn etnıkalyq qazaqstardyń áleýetin paıdalaný; shetelde jumys isteıtin qazaqstandyqtardyń eńbek quqyqtaryn qorǵaý», dedi Tamara Dúısenova.
Birinshi mindet aıasynda ekonomıka salalary úshin suranysqa ıe tehnologııalar boıynsha úzdik oqytýshylardy, úzdik ǵalymdardy, tapshy kásipter boıynsha mamandardy tartý maqsatynda jeńildetilgen vızalar men 10 jylǵa turý quqyǵy beriledi.
Mınıstrdiń aıtýynsha, ekinshi mindetti sheshý úshin 300 myń AQSh dollarden kem emes ınvestısııa salýdy kózdegen shetel kásipkerleri úshin «Investorlyq vızany» usynady.
«Úshinshi mindette kórsetilgen tapsyrmalardy sheshý úshin «Atameken» kartasy engiziledi, ol joǵary deńgeıdegi kásipqoı nemese ózderi turatyn elderde tabysty bıznes-keısterdi iske asyrǵan jáne olardy Qazaqstanda iske asyrýdy qalaıtyn etnıkalyq qazaqtarǵa beriledi. Ol azamattar merzimi 10 jylǵa deıin sozylatyn jeńildetilgen vıza rásimdep, Qazaqstanda turyp óz kásibin júrgizýge múmkindik alady», dep túsindirdi ol.
Qandastardy qabyldaý tetigi de qaıta qaralatynyn mınıstr atap ótti. Qandastardy qonystandyrý saıasatyn eldiń demografııalyq jáne ekonomıkalyq úrdisterin eskere otyryp, olardy qujattardy qabyldaýdyń bastapqy kezeńinde qonystandyrý óńirlerine kóship-qonýdy qosymsha yntalandyra otyryp túbegeıli reformalaý usynyldy.
Shetelde jumys isteıtin qazaqstandyqtardyń eńbek quqyqtaryn qorǵaý úshin azamattarymyz eń kóp jumys isteıtin elderde qazaqstandyq eńbek mıgranttarynyń quqyqtaryna kepildik beretin memleketaralyq kelisimder paketin qabyldaý qarastyryldy.