Astanada Oqý-aǵartý mınıstrliginiń kýbogi úshin oqýshylar arasynda ótken respýblıkalyq debat týrnıri aıaqtaldy. Elimizdiń ár óńiriniń 27 oqýshysy jeńimpaz atandy. Olar I, II, III dárejeli dıplomdarmen jáne baǵaly syılyqtarmen marapattaldy, dep habarlaıdy Egemen.kz atalǵan mınıstrliktiń baspasóz qyzmetine silteme jasap.
Respýblıkalyq kezeńdegi zııatkerlik saıysqa oblystyq týrnırlerdiń jeńimpazy atanǵan 100-den astam oqýshy qatysqanyn aıta keteıik. Is-shara Qazaqstannyń Táýelsizdik kúnine oraı uıymdastyryldy.
Qazaq, orys jáne aǵylshyn lıgalary boıynsha birinshi oryndy jáne Oqý-aǵartý mınıstrliginiń kýbogin Pavlodar jáne Aqtóbe oblystarynyń komandalary jeńip aldy. Úzdik spıkerler Oralǵazy Aqnıet (Semeı q.), Murzadilova Arýhan (Astana q.), Abdýsamatova Sevınch (Túrkistan oblysy) atandy.
Oqý-aǵartý mınıstri jeńimpazdardy quttyqtap, mınıstrlik aldaǵy ýaqytta da oqýshylar arasynda debat qozǵalysyn nasıhattaý jumysyn jalǵastyra beretinin atap ótti.
«Men stýdenttik kezimde debattarǵa belsene qatystym. Sondyqtan debattardyń kóptegen mańyzdy quzyret pen daǵdyny úıretetinin bilemin. Pikirtalasqa daıyndalǵan kezde sen kez kelgen máselege ádettegideı tek bir jaǵynan ǵana emes, sonymen birge synı turǵydan qaraýdy, jaǵymdy jáne jaǵymsyz jaqtaryn kórýdi úırenesiń. Barlyq durys jáne kemshin tusyn ólsheısiń. Bul óte mańyzdy. Qazir balalar gadjetterdi jıi paıdalanady, bul rette oqýshylarymyz óz ustanymdaryn dáleldeı bilip, synı turǵydan oılaýy, topta jumys isteı bilýi mańyzdy. Barlyq qatysýshyny jetistikterimen quttyqtap, jańa jeńister tilegim keledi. Sizdermen birge debat qozǵalysyn damytýdy jalǵastyramyz», dep aıtty Ashat Aımaǵambetov.
Búgingi tańda qazaqstandyq mektepterde debat qozǵalysy belsendi damyp kele jatqanyn aıta keteıik. Jalpy respýblıka boıynsha debat klýbtarynyń sany 6 myńnan asady. Olarǵa 100 myńnan astam oqýshy barady.
Qazaqstanda jyl saıyn 20 myńnan astam debat týrnıri ótkiziledi, oǵan ondaǵan myń stýdent pen oqýshy qatysady. Elimizde oqýshylardy pikirsaıys ónerine baýlıtyn 100-den astam adamnan quralǵan tájirıbeli ulttyq pikirsaıysshylar pýly qalyptasty. Sonymen qatar kolledjder men mektepterde debat klýbtaryna kómektesý úshin stýdenttik desanttar qurylyp jatyr.