Astanada sport salasyndaǵy jyldyń tańdaýly júldesi – «Jeńimpaz rýhy» ulttyq syılyǵynyń jeńimpazdary belgili boldy, dep habarlaıdy Egemen.kz.
Saltanatty keshte Mádenıet jáne sport mınıstrligi úzdik sportshylardy, bapkerlerdi jáne túrli mekemelerdegi ózge de tańdaýly mamandardy marapattap, jyl boıy atqarǵan eńbegine qurmet kórsetti.
«Áýeli barlyq júldegerdi quttyqtaǵym keledi. Bıyl atap aıtar jeńisterimiz de kóp boldy. Búgin sol sáttiń qaharmandary osynda jınaldy. Memleket sporty damytý, sportshylardy yntalandyrý boıynsha bar jaǵdaıdy jasap jatyr. El sportyna serpin beretin birqatar zańnama da qabyldandy. Dese de alda jumys kóp. Kelesi jyly Olımpıadaǵa daıyndyqtyń qyzar shaǵy. Bizdiń quramalar barynsha kóp joldama ıelenýge baryn salmaq. Al maqsat – Parıjdegi basty básekede sátti óner kórsetý», dedi Mádenıet jáne sport vıse-mınıstri Serik Jarasbaev.
Qazylar alqasy tańdaǵan 14 nomınasııa boıynsha 20 úzdik kelesideı:
1) «Jyldyń úzdik sportshysy» – Jámıla Baqbergenova (jazǵy sport túrlerinen) men Aleksandr Gerlıs (qysqy sport túrlerinen);
2) «Jyldyń úzdik jattyqtyrýshysy» – Nursultan Temirov (jazǵy) pen Anton Jdanovıch (qysqy);
3) «Jyldyń úzdik akkredıttelgen sport federasııasy» – Ulttyq konkı tebýshiler federasııasy;
4) «Jyldyń úzdik sport mekemesi» – Atyraý oblysy «Múgedekterdiń sport uıymy»;
5) «Jyldyń úzdik sport óńiri» – Qaraǵandy oblysynyń Dene shynyqtyrý jáne sport basqarmasy;
6) «Aýyldaǵy úzdik jattyqtyrýshy» – Dastan Balabekov (Jetisý oblysy);
7) «Dene shynyqtyrý jáne sport bóliminiń úzdik mamany» – Irına Novıkova men Elena Galıs (Astana);
8) «Jyldyń úzdik balalar jattyqtyrýshysy» – Samat Sapıshev (Shymkent);
9) «Oıyn túrleri boıynsha úzdik sport komandasy» – «Qýanysh» voleıbol klýby (SQO);
10) «Aýyldaǵy úzdik dene shynyqtyrý jáne sport bóliminiń ádiskeri» – Bekjan Adambekov (Túrkistan oblysy);
11) «Jyl jańalyǵy – úzdik sportshy» – Elena Rybakına;
12) «Jyldyń úzdik mesenaty» – Qaıyrbek Sádýaqasuly Hamzın (SQO);
13) «Jastar men jasóspirimder arasyndaǵy úzdik sportshy» – Alan Qurmanǵalıev (ústel tennısi), Evgenıı Fedorov (velosport), Marııa Brovkova (kanoede eskek esý);
14) «Seıdahmet Berdiqulov atyndaǵy úzdik sport jýrnalısi» nomınasııasy – Aslan Qajenov (Úzdik televızııalyq reportaj), Ǵalym Súleımen (Úzdik fotoreportaj), Bek Tóleýov (Úzdik jarııalanym).
Jyldy qortyndylaıtyn bul syılyq endi dástúrli túrde ótedi.