Qostanaı oblysy PD bastyǵy Arqalyqta qyzdy qutqarǵan polıseılerdiń ata-analaryn marapattady, dep habarlaıdy Egemen.kz Polisia.kz-ke silteme jasap.
Qostanaı oblysy PD bastyǵy Erlan Omarbekov jyl qorytyndysy boıynsha jedel keńes barysynda batyldyq tanytqan jáne qyzmettik mindetterin adal atqarǵan, erekshe kózge túsken qyzmetkerlerdi marapattady.Osylaısha qyzdy qutqarǵan Arqalyq qalasy polısııa basqarmasynyń qyzmetkerleri kórsetken erligi úshin marapattaldy. Patrýldik polısııa vzvody qyzmetiniń ınspektory Almat Ámirhanǵa «Quqyqtyq tártipti qamtamasyz etýge qosqan úlesi úshin» medali tabystaldy. Onyń áriptesi Rýslan Qapsamatovqa «Ishki ister organynyń úzdigi» tósbelgisi taǵyldy. Qyzmetkerlerden basqa, Erlan Omarbekov polısııa qyzmetkerleriniń ata-analary Rýslan Qapsamatovtyń anasy Nursaýle Dúısebekova men Almat Ámirhanynyń ákesi Erlan Jarasovqa alǵysyn bildirdi. Olarǵa Qostanaı oblysy polısııa departamentiniń alǵys hattary tabystaldy.
– Osyndaı uldardy tárbıelegenderińiz úshin shyn júrekten sizderge alǵysymdy bildiremin. Bul ózgelerge úlgi bolarlyq is. Sizder osyndaı shuǵyl jaǵdaıda durys sheshim qabyldaı bildińizder. Qyzmetterińizde tabys tileımin, – dep atap ótti departament bastyǵy Erlan Omarbekov.
«Qazaqstan polısııasyna 30 jyl» tósbelgisimen Jitiqara qalasynda qylmys ornynda uıaly telefon urysyn ustaǵan Qylmystyq-atqarý júıesi departamenti qyzmetkeri Aıdarhan Mádıev marapattaldy. Tósbelgiler Jangeldın aýdany ákimdiginiń Shıeli aýyldyq okrýginiń ákimi Erbol Dosmaǵanbetovke jáne Jangeldın aýdany polısııa bóliminiń ýchaskelik ınspektory Jantóre Qalenge ákimshilik-aýmaqtyq ýchaskede quqyq buzýshylyqtar men qylmystardyń aldyn alýǵa qosqan úlesi úshin tabystaldy.
Eske salaıyq, Jangeldın aýdanynyń eki aýylynda alkogol satýǵa tyıym salynǵandyqtan, birneshe jyl boıy qylmys tirkelmegen. Sondaı-aq Rýdnyı qalasynyń polısııa basqarmasy, Áýlıekól, Qarasý, Amangeldi, Jangeldın aýdandarynyń polısııa bólimderi «Úzdik polısııa bólimsheleri» degen ataqqa ıe boldy.