Bul týraly QR Ortalyq saılaý komıssııasy tóraǵasynyń orynbasary Konstantın Petrov málimdedi, dep habarlaıdy Egemen.kz.
«Máslıhat depýtattaryn saılaý jóninde aıtatyn bolsaq, elimizde túrli deńgeıdegi 223 máslıhat bar. OSK qaýlysymen barlyq deńgeıdegi máslıhattarda mandattar sany – 3415 ekeni anyqtaldy. Olardyń barlyǵy 19 naýryzdaǵy saılaýǵa qatysady», dedi QR OSK tóraǵasynyń orynbasary Konstantın Petrov.
Spıkerdiń aıtýynsha, 20 jasqa tolǵan Qazaqstan Respýblıkasynyń azamaty máslıhat depýtattyǵyna kandıdat bola alady. Bul rette oblystar, respýblıkalyq mańyzy bar qalalar, astana máslıhattarynyń depýtattary aralas saılaý júıesi boıynsha saılanady.
«Oblystardyń, respýblıkalyq mańyzy bar qalalardyń jáne elordanyń máslıhattaryna depýtattardyń 50%-y majorıtarlyq júıe boıynsha, 50%-y partııalyq tizimder boıynsha saılanady. Aýdandar men qalalardyń máslıhattaryna saılaý tolyǵymen majorıtarlyq júıede ótetinin atap ótý qajet. Eger máslıhatta 30 depýtattyq mandat bolsa, onyń 15-i partııalyq tizim boıynsha jáne 15-i aýmaqtaǵy birmandatty aýmaqtyq okrýgter boıynsha saılanady», dep naqtylady Konstantın Petrov.