Bul týraly Memleket basshysy Qasym-Jomart Toqaev Parlament Senatynyń otyrysynda aıtty, dep habarlaıdy Egemen.kz.
«Jaqynda ǵana Májilis pen máslıhattarǵa saılaý naýqany óz jumysyn bastady. Bul negizgi memlekettik ınstıtýttardy keshendi túrde jańǵyrtýdyń sońǵy satysy bolmaq. Májilis pen máslıhattardyń aralas modelin qalyptastyrýǵa kóship jatyrmyz. Barlyq áleýmettik toptyń múddesin qorǵaý turǵysynan munyń máni zor. Bul ózgeris ókildi bılik tarmaqtarynyń barlyq deńgeıine aıtarlyqtaı yqpal etedi», dedi Memleket basshysy.
Osy oraıda ol sońǵy jyldary júrgizilgen saıası ózgerister, saılaý zańnamasyn maqsatty túrde lıberaldandyrý Qazaqstanda partııa qurý isine tyń serpin bergenin sóz etti.
«Uzaq ýaqyttan beri elimizde alǵash ret birneshe jańa partııa resmı túrde tirkeldi. Atalǵan derekti aralyq qorytyndy retinde atap ótýge bolady. Bul – alǵa qaraı jasalǵan mańyzdy qadam», dedi ol.