Pavlodar - Qyzylorda avtojolynyń 244-shi shaqyrymynda jol apaty tirkeldi, dep habarlaıdy Egemen.kz.
Pavlodar oblysy polısııa departamentiniń málimetinshe, keshe Qaraǵandy oblysynyń shekarasyndaǵy Marǵulan aýylynyń mańynda Mercedes kóligi men Lexus kóligi soqtyǵysqan. Belgili bolǵandaı, Mercedes kóliginiń 43 jastaǵy júrgizýshisi basyp ozý kezinde qarsy jolaqqa shyǵyp ketken. Saldarynan Mercedes avtokóliginiń júrgizýshisi men 75 jastaǵy jolaýshysy alǵan jaraqattarynan oqıǵa ornynda qaıtys boldy.
Sondaı-aq Mercedes kóliginiń ózge eki jolaýshysy - 48 jastaǵy áıel men onyń 7 jastaǵy qyzy, Lexus avtokóligin tizgindegen 36 jastaǵy qaraǵandylyq turǵyn túrli jaraqattarmen Ekibastuz qalasynyń aýrýhanasyna jetkizilgen.
Atalǵan derekke qatysty tergeý jumystary júrip jatyr. Saraptama taǵaıyndaldy. Avtokólikter aıyp turaǵyna qoıyldy.