Keıingi úsh jylda «QazExpoCongress» ulttyq kompanııasy óziniń ımıdjdik jobasyn transformasııalap, bilim berý jáne qarjy uıymdaryn shoǵyrlandyra aldy. Qazirgi tańda Memleket basshysynyń tapsyrmasyna sáıkes EKSPO aýmaǵyn qoǵamdyq keńistik retinde damytýǵa erekshe kóńil bólinip otyr.
Máselen, EKSPO iskerlik ortalyǵynyń aýmaǵynda jalpy aýdany 530 myń sharshy metrden astam 16 ǵımarat ornalasqan. Olar 100 paıyz toltyrylǵan, rezıdentter sany 15 myń adamnan asady. Al bıznes sýbektileri úshin «A» sanatty bıznes ortalyqtardyń álemdik standarttaryna sáıkes keletin Bıznes ortalyǵy jumys isteıdi.
EKSPO aýmaǵynyń negizgi nysandarynyń biri – Kongress ortalyǵy. Onda konsertten bastap, joǵary deńgeıdegi resmı kezdesýlerge deıingi is-sharalar ótkiziledi. Bıyl 50-den astam is-shara josparlanǵan, onyń ishinde qazaqstandyq jas jáne attary shyqqan oryndaýshylar – Dequine, Mıras Júginisov, sondaı-aq sheteldik estrada juldyzdary Lara Fabıannyń, Jony-diń, Evgenıı Chebatkovtyń, MakSım-niń jáne basqalardyń konsertteri bar.
2020 jyly Ortalyq Azııadaǵy biregeı iri kórme alańyna aınalǵan Halyqaralyq kórme ortalyǵy ashyldy. Ol UFI dúnıejúzilik kórme ındýstrııasy qaýymdastyǵynyń sertıfıkatyn alǵan. Kórme alańynyń júktemesi jylyna 310 kúndi quraıdy. Bıyl munda 35-ke jýyq is-shara ótkizý josparlanǵan. Atap aıtqanda, Automechanika Astana 2023, Eurasian Book Fair VI Eýrazııalyq halyqaralyq kitap kórmesi, Kazakhstan Industry Week óńdeý ónerkásibiniń III Halyqaralyq kórmesi jáne t.b.
EKSPO aýmaǵynda jyl saıyn maýsym aıynda jazǵy sahna jumysy bastalady. Naq osy sahnada Ninety One toby, Djeıran, «Raim & Artur» dýeti, DJ Smash, DJ Timoffey, Erke Esmahan, Moldanazar, Qaırat Nurtas, Say Mo, Abdr., halyqaralyq zamanaýı etnostyq mýzyka festıvali The Spirit of Eurasia, The Limba, «Format» toby, Aıqyn, Cover Fest (Batyrhan Shúkenovti eske alý keshi), rok festıvali, ORDA FM gala-konserti, Cosplay Festival, etnofestıval jáne basqa estrada ártisteriniń open air konsertteri ótti.
Sonymen qatar keshen aýmaǵynda elorda turǵyndary men qonaqtaryna «Line Brew», «Kakao Dak», «Harrats Pub», «Prime Golf» golf sımýlıatory qyzmetteri usynylady. Jaqyn arada «Bronx» fıtnes-klýbynyń, «Coffee boom» kofehanasyn ashý josparlanyp otyr. Kelýshilerge yńǵaıly bolýy úshin táýlik boıy jumys isteıtin 3 myń avtokólikke arnalǵan kólik jýý orny bar jerasty parkıngi barlyǵyn da atap ótken jón.