Kókshetaý polıseıleri azamattyq nekedegi kúıeýin óltirdi degen kúdikke ilingen áıel adamdy ustady, dep habarlaıdy Egemen.kz.
Polısııa qyzmetkerleri oqıǵa ornyna barǵan kezde 45 jastaǵy er adamnyń máıitin tapqan. Onyń denesinde zorlyq-zombylyq belgileri bolǵan.
Tergeý barysynda er adamǵa aýyr dene jaraqatyn saldy degen kúdikpen marqummen birge turǵan áıel ustalǵan.
Qaıǵyly oqıǵa bolǵan kúni azamattyq nekedegi erli-zaıypty páterde ózderi bolǵany jáne olardyń arasynda janjal týyndaǵany anyqtalǵan. Janjal kezinde kúdikti er adamnyń keýdesine pyshaq suqqan, sot-medısınalyq sarapshynyń qorytyndysy boıynsha jábirlenýshi sonyń saldarynan qaıtys bolǵan.
Atalǵan derek boıynsha QR Qylmystyq kodeksiniń 106-baby 3-bóligi boıynsha tergeý amaldary bastaldy.