Jetibaı ken ornyndaǵy uńǵymada montajdaý kezinde apat boldy. Oqıǵa saldarynan bir jumysshy qaza tapty, taǵy bireýi aýrýhanaǵa jatqyzyldy, dep habarlaıdy Egemen.kz.
Oqıǵa ornyna jedel túrde Mańǵystaý aýdanynyń polısııa qyzmetkerleri bardy. Jazataıym oqıǵanyń mán-jaıyn anyqtaý maqsatynda quqyq qorǵaý organdarynyń qyzmetkerleri sotqa deıingi tergeý júrgizedi. Oqıǵa týraly jedel túrde Mańǵystaý oblysynyń Eńbek basqarmasyna, arnaıy tergeý júrgizý úshin Mańǵystaý oblysynyń ındýstrııalyq damý jáne ónerkásiptik qaýipsizdik komıtetiniń departamentine habarlama jiberilgen.
Mańǵystaý oblysynyń Eńbek basqarmasy basshylyq etetin komıssııa quryldy.
«Jazataıym oqıǵa boıynsha tergeýdi «Mańǵystaýmunaıgaz» AQ basshylyǵy jeke baqylaýǵa aldy. Tergeý belgilengen merzimde júrgizilip, kináli adamdar Qazaqstan zańnamasyna sáıkes jazalanady», dedi kompanııa ókilderi.