BUU jarııalaǵan Adam damýy ındeksi boıynsha Qazaqstan 2021 jyly álemniń 191 eli arasynda 56-orynǵa ǵana ıe boldy. Bul kórsetkish ótken jyldarǵa qaraǵanda tómen, dep habarlaıdy Egemen.kz.
«Adam kapıtaly - kez kelgen elde turaqty ekonomıkalyq ósýdiń negizgi draıveri. Dúnıejúzilik banktiń málimetinshe, damyǵan elderdegi ulttyq baılyqtyń 70 paıyzy - adam kapıtaly bolsa, qalǵan 30 paıyzy - tabıǵı jáne ónerkásip resýrstary. Batys Eýropada adam kapıtalynyń úlesi 70-80 paıyzdy quraıdy. Qazaqstanda bul kórsetkish – nebári 40 paıyz», dedi Oljas Quspekov Premer-mınıstrdiń atyna joldaǵan depýtattyq saýalynda.
Depýtattyń aıtýynsha, bul kórsetkishtiń tómendeýine pandemııa kezeńi áser etken. Elimizde adamı kapıtaldy damytýǵa qatysty ortaq kózqaras joq, bul salany retteıtin biryńǵaı strategııalyq baǵdarlamalyq qujat ta jasalmaǵan.
«Álemdik tájirıbede adamdarǵa ınvestısııa tamaqtanýdyń, medısınalyq kómektiń sapasyn arttyrý, sapaly bilim berý, jumys oryndaryn qurý jáne kásibı biliktilikti arttyrý arqyly júzege asady. Adamı kapıtaldy qurýda eń joǵary jetistikterge qol jetkizgen elder turaqty kúsh-jigerde, mınıstrlikaralyq úılestirýdi ornatýda jáne strategııalar men baǵdarlamalardy daıyndaýda tabysty boldy. Osyǵan baılanysty adamı kapıtaldy damytýdyń ulttyq baǵdarlamasyn ázirleýdi usynamyn», dedi ol.