QR Azamattyq avıasııa komıtetiniń tóraǵasy Talǵat Lastaev Almaty áýejaıyndaǵy jańa termınal qurylysyna qansha qarajat ketetinin aıtty, dep habarlaıdy Egemen.kz.
Onyń aıtýynsha, qazir tórt jobanyń qurylysy júrip jatyr.
«Atap aıtqanda, Almaty áýejaıynda 200 mıllıon dollardan astam qarjyǵa jańa halyqaralyq termınaldyń qurylysy júrip jatyr. Aldaǵy jazda paıdalanýǵa beriledi dep josparlanyp jatyr. Jalpy oryndalǵan jumys kólemi 60 paıyzdy quraıdy», dedi Talǵat Lastaev.
Sonymen qatar, jeke ınvestısııa esebinen Shymkent jáne Qyzylorda áýejaılarynda jańa jolaýshylar termınaldarynyń qurylysy jalǵasyp jatyr, al Qostanaı áýejaıy termınalyn úkimet rezervi esebinen teleskopııalyq baspaldaq ornatýmen jáne kelý zalynyń qurylysymen qaıta jańǵyrtý jumystary júrgizilip jatyr.
Sondaı-aq Memleket basshysynyń tapsyrmasy boıynsha Pavlodar áýejaıynyń ushý-qoný jolaǵyn jáne taksı jolyn, Balqash áýejaıynyń perronyn qaıta jańartý máselesi pysyqtalyp jatyr.