Premer-mınıstrdiń birinshi orynbasary Roman Sklıar Investısııalyq shtabtyń kezekti otyrysyn ótkizdi, onda ınvestısııa tartý boıynsha júrgizilip jatqan jumystardyń aǵymdaǵy máseleleri qaraldy, dep habarlaıdy Egemen.kz Úkimettiń baspasóz qyzmetine silteme jasap.
Energetıka vıse-mınıstri Erlan Aqkenjenov mınıstrliktiń ınvestısııa tartý jáne ózi jetekshilik etetin ınvestısııalyq jobalardy júzege asyrý boıynsha atqaryp jatqan jumystary týraly aıtyp berdi. Máselen, ótken jyly mınıstrlik 2026 jylǵa qaraı otyn-energetıka keshenine negizgi kapıtalǵa ınvestısııa kólemin 2 ese (9 414 mlrd teńge) arttyrý mindetin qoıdy. Bıylǵy jeti aıda bul salaǵa quıylǵan ınvestısııa kólemi josparlanǵan 2 606 mlrd teńgeniń ornyna 2 615 mlrd teńgeni qurady.
Sonymen qatar ınvestısııalyq jobalardyń jalpyulttyq pýly aıasynda 5 jyl ishinde energetıka salasynda 66 jobany iske asyrý kózdelgen, olardyń ishinde 2023 jyly 2 600 mlrd teńge somasyna 22 joba iske asyrylatyn bolady. Bul rette 2026 jylǵa qaraı 14 759 mlrd teńge somasyna ınvestısııalar tartý josparlanyp otyr.
«KAZAKH INVEST» UK» AQ basqarma tóraǵasy Meıirjan Iýsýpov qazirgi ýaqytta KAZAKH INVEST jáne AHQO negizinde qurylǵan Task Force bólimshesiniń strategııalyq ınvestısııalyq jobalarynyń jalpy quny $13 mlrd-tan asatyn 70 jobany quraıtynyn aıtty. QR SIM josparlary boıynsha osy jyldyń sońyna deıin tórt ınvestısııalyq kelisimge qol qoıý josparlanyp otyr. Qazirgi ýaqytta eki Kelisim jasaldy.
«Búgingi tańda ekonomıkanyń túrli salalarynda, sonyń ishinde óńdeý ónerkásibinde Investısııalyq kelisimder jasaýǵa resmı túrde 6 ótinim berildi. Bul jobalar boıynsha qujattardyń tolyq paketi usynyldy. Taǵy 17 joba – ótinimder men Kelisimderdi ázirleý satysynda. Biz bul jobalardy qoldaý boıynsha jumysty jalǵastyramyz», dep túıindedi sózin Meıirjan Iýsýpov.
Otyrysty qorytyndylaı kele, QR Premer-mınıstriniń birinshi orynbasary Roman Sklıar ýákiletti organdarǵa naqty tapsyrmalar berip, sondaı-aq ınvestısııalyq jobalardy iske asyrýdyń mańyzyn jáne ınvestısııa tartý boıynsha jumysty kúsheıtý qajettigin atap ótti.