Otbasy kúni qarsańynda, «Mereıli otbasy» ulttyq konkýrsy laýreattaryn mereıtoılyq saltanatty marapattaý rásimi ótti, dep habarlaıdy Egemen.kz Mádenıet jáne aqparat mınıstrliginiń resmı saıtyna silteme jasap.
Jyl saıyn ótkizý ıgi dástúrge aınalǵan úlgili otbasylar baıqaýy – elimizde januıa qundylyqtarynyń rólin arttyryp, otbasy men nekeniń oń ımıdjin dáripteıtin aýqymdy da mańyzdy sharalardyń biri. Konkýrsqa 10 jyl ishinde Qazaqstannyń barlyq óńirinen 20 myńnan astam otbasy qatysqan.
Qazaqstan Respýblıkasy Mádenıet jáne aqparat mınıstri, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Aıda Balaeva saltanatty sharanyń ashylýy barysynda baıqaý jeńimpazdaryna Memleket basshysynyń quttyqtaýyn oqydy.
Bıyl konkýrsqa 3 344 otbasy qatysty. Olardyń 40% qalalyq jáne 60% aýyldyq otbasylar.
Túrli kásip pen eńbek áýletterinen quralǵan 20 otbasy – óńir jeńimpazdary atandy. Olardyń qatarynda ustazdar, qolónershiler, metallýrgter, áskerı qyzmetshiler, kásipkerler, agroónerkásip salasynyń mamandary bar.
Otbasynyń árbir múshesi – aýyldastarynyń, qala turǵyndarynyń, áriptesteriniń, kórshi-qolańnyń qurmetine bólengen, Otanyna adal qyzmet etip júrgen eńbek adamy, aýyldyń, qalanyń qarapaıym eńbekkerleri.
Marapattaý rásimine Memlekettik organdardyń ókilderi, Parlament Senaty men Májilisiniń depýtattary, Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri qatysty.
Laýreat otbasylar dıplomdarmen jáne estelik syılyqtarmen marapattaldy. Marapattaý rásimi qazaq estrada juldyzdarynyń qatysýymen ótken merekelik konsertpen jalǵasty.