Senator Darhan Qydyráli Qazaqstandaǵy áıelder jumysta zorlyq-zombylyq pen qýdalaýǵa tap bolatyny týraly Premer-mınıstrge joldaǵan depýtattyq saýalynda elimizde Eńbek mınıstrligimen birlesip júrgizilgen BUU zertteýiniń nátıjelerin jarııa etti, dep habarlaıdy Egemen.kz Joǵary Palatanyń baspasóz qyzmetine silteme jasap.
Depýtattyń aıtýynsha, harassmentke ushyraǵan áıelderdiń 57,6%-y atalǵan faktiler birneshe ret bolǵanyn ataǵan. Bul oraıda harrasmenttiń belgili bir tulǵaǵa fızıkalyq qana emes, mentaldy nemese emosııalyq qysym kórsetýi ekenin eskerý qajet. Zertteý kórsetkendeı, harassment jıi bolatyn jerler – turaqty jumys orny (41%) jáne korporatıvtik is-sharalar (38%). Adamdardyń ýaqytynyń kóp bóligi jumys ornynda ótetinin eskersek, bul alańdatarlyq jaıt.
Depýtattyń pikirinshe elimizde harassmenttiń aldyn alatyn arnaıy zańnyń bolmaýy úlken másele. Jazalanbaı jeńil qutylatynyn biletinder túrli júgensizdikke barady, qylmysty qymsynbaı jasaıdy. Sondyqtan azamattarymyzdy zorlyq-zombylyq pen harassmentten qorǵaýda zańnamany kúsheıtý kezek kúttirmeıtin is.
«Zań ústemdigi saltanat quratyn ádiletti Qazaqstanda kez kelgen jastaǵy nemese jynystaǵy azamat kez kelgen jerde ózin qaýipsiz ári jaıly sezinýi kerek», dedi Darhan Qydyráli.
Depýtat D.Qydyráli sondaı-aq Halyqaralyq eńbek uıymy №190 «Eńbek salasyndaǵy zorlyq-zombylyq pen harassmentti joıý týraly» Konvensııany ázirlegenin atap ótti. 2019 jylǵy 21 maýsymda qabyldanǵan konvensııany álemniń 19 eli ratıfıkasııalaǵan. Depýtattyń pikirinshe, Qazaqstannyń atalǵan qujatqa qosylǵany mańyzdy qadamdardyń biri bolmaq.
Jyl saıyn BUU 25-shi qarasha – 10 jeltoqsan aralyǵynda zorlyq-zombylyqqa qarsy 16 kúndik ótkizedi. Qazaqstan da osy kúnderdi tıimdi paıdalanǵany jón.
Senat depýtaty saýalyn naqty úsh suraqpen túıindedi.
«Qazaqstan zańnamalarynda atap aıtqanda, Qylmystyq, Eńbek, Ákimshilik kodeksterde jumys ornyndaǵy harassment nemese zorlyq uǵymdaryn engizý, mundaı zań buzýshylyqtarǵa qarsy tıisti jazany belgileý qaı deńgeıde júrgizilip jatyr? Elimiz halyqaralyq eńbek uıymynyń «Eńbek salasyndaǵy zorlyq-zombylyq pen harassmentti joıý týraly» Konvensııasyna qashan qosylady? Jalpy harassmentke nemese zorlyq-zombylyqqa qarsy keshendi is-sharalar jospary bar ma?», dedi senator.