Qazaqstan ulttyq telearnasynyń tapsyrysymen túsirilgen «Mirjaqyp. Oıan Qazaq» kórkem fılminde basty roldi somdaǵan akter Baqyt Qajybaev jańa kınoǵa tústi, dep jazady Egemen.kz.
Mirjaqyp Dýlatulynyń rolin joǵary deńgeıde somdap, kópshiliktiń kóńilinen shyqqan akter jańa fılmge túskenin jarııalady. Fılm «Nabat Operasııasy» dep atalady.
«Shynaıy oqıǵaǵa negizdelgen tolyqmetrajdy bul fılm, kelesi jyldyń basynda ózderińizge jol tartpaq. О́zim úshin kezekti bir tájirıbe boldy, ujymǵa alǵysym sheksiz! Bul joly keıipkerim qandaı bolmaq? Qalaı oılaısyz?», dep jazdy akter Instagram paraqshasynda.
«Nabat Operasııasy» fılmi shynaıy oqıǵaǵa negizdelgen. Fılmge arqaý bolǵan oqıǵa bylaı órbıdi:
6 qylmysker kúzetshilerdi óltirip, 2 kalashnıkov avtomatyn, 8 makarov tapanshasyn, oq dárilerin alyp qashyp ketedi. Olar Qyzylordadan Saryaǵashqa ketip bara jatqan jolaýshylar avtobýsyn basyp alady. Qylmyskerler avtobýstaǵy adamdardy kepilge alyp, quqyq qorǵaý organdary qyzmetkerlerinen ushaq pen mol aqsha talap etedi. Sol kezdegi memlekettik qaýipsizdik qyzmetiniń arnaıy bólimsheleri «Nabat» operasııasyn júrgizip, qylmyskerlerdiń kózin joıady.
1992 jyly júrgizilgen bul operasııa Táýelsizdik tarıhynda transportta kepildikke alynǵan azamattardy qutqarý baǵytyndaǵy alǵashqysy boldy. «Nabat» operasııasynyń qurylymy sheteldik quqyq qorǵaý organdarynyń da qyzyǵýshylyǵyn týdyrǵan.
Sol tusta «Nabat» operasııasyna 10 quqyq qorǵaý organynyń qyzmetkeri qatysqan. Keıinnen QR Tuńǵysh Prezıdenti N.Nazarbaev olardy arnaıy qabyldap, qurmet gramotalarymen marapattaǵan.
Fılmniń qoıýshy rejısseri buǵan deıin kórermen kózaıymyna aınalǵan «Syrǵalym», «Qyzdar», «Qustar áni», «Serdse moe - Astana» serıaldary men «Qarashańyraq», «Arman», «Aına» fılmderin túsirgen - Rashıd Súleımenov.
Qoıýshy-operatory: Ernur Ryspaev
Ssenarıı avtorlary: Ilham Djalılov, Rashıd Súleımenov, Rýstam Azamatov.
«Nabat» operasııasyn túsirýshi ujym fılmge sheteldik akterlerdi de shaqyrǵan. Olardyń qatarynda reseılik jáne qazaqstandyq akter - Alekseı Shemes, belarýsııalyq akter ári kaskader Sergeı Byhov, ózbekstandyq teatr jáne kıno akteri - Anvar Kartaev bar.
Al basty rolderdi somdaǵan otandyq akterler - Baqyt Qajybaev pen Áıgerim Júnisova.
Sh.Aımanov atyndaǵy «Qazaqfılm» túsirgen fılm jańa jyldyń basynda kórermenge jol tartady.