Aldaǵy sý tasqyny kezeńine daıyndyq bastaldy. Máselen, sý tasqyny jaǵdaıynyń yqtımal asqynýlaryna jedel den qoıý maqsatynda azamattyq qorǵaýdyń memlekettik júıesiniń kúshteri men quraldarynyń arnaıy toptary quryldy, dep habarlaıdy Egemen.kz Úkimettiń baspasóz qyzmetine silteme jasap.
Úkimet otyrysynda Tótenshe jaǵdaılar mınıstri Syrym Sháriphanov kóktemgi tasqynǵa tótep berýdegi qaýqaryn baıandady. Sala basshysy quramynda 39 myńnan astam adam, 11 myńǵa jýyq tehnıka, 500-den astam júzý quraldary jáne 3 myńnan astam motopompa saqadaı-saı ekenin aıtty.
Qutqarý kúshi men quraldardy jedel tasymaldaý, sondaı-aq zardap shekken halyqty shuǵyl evakýasııalaý jaǵdaıynda «Qazavıaqutqarý» AQ áýe kemeleri turaqty daıyndyqta bolady. Azamattyq qorǵanystyń áskerı bólimderi de qutqarý operasııalaryna qatysýǵa daıyn. Sonymen qatar sý tasqynyna qarsy is-sharalardyń tıisti jol kartasyn iske asyrý jalǵasyp jatyr. Atap aıtqanda, Aqmola oblysynda Esil sý rettegishin salý boıynsha jobalaý smetalyq qujattamalary ázirlenip jatqanyn jetkizdi.