Dalasy darqan qazaq topyraǵynda túrli etnos ókili tatý-tátti ómir súrip, eldiń órkendeýi jolynda aıanbaı qyzmet etip keledi. Búginde tarıhyn taǵdyr biriktirgen halyqtyń múddesi ortaq, maqsaty bir. Bul bir ǵana Otanymyzdyń tútinin túzý shyǵaryp, táýelsizdigimizdi kózdiń qarashyǵyndaı qorǵaý.
Kóktemniń alǵashqy kúnimen qatar kelgen Alǵys aıtý kúni Ulttyq ulan qatarynda azamattyq boryshyn ótkerip jatqan merzimdi áskerı qyzmetshiler úshin de qundy ári taǵylymǵa toly. Osy oraıda «Shyǵys» óńirlik qolbasshylyǵyna qarasty áskerı bólimderdegi ózge etnos ókilderi mereıli mereke aıasynda paıymdy pikirlerimen bólisti.
5512 áskerı bóliminiń qatardaǵy jaýyngeri Ibragım Hakımovtiń otbasy osydan jıyrma eki jyl buryn Qazaqstanǵa Cheshenstandaǵy azamattyq soǵystan bassaýǵalap kelgen. «Týǵan elin tastap ketý ata-anam úshin ońaıǵa soqpady. Ishki qaqtyǵystardan kúıi ketip, berekesi qashqan olardyń tyǵyryqtan shyǵar basqa joly bolmasa kerek. Nege ekenin bilmedim, el shyǵysyndaǵy Semeı qalasyna qonys aýdarypty. Taǵdyr taýqymeti tar jol, taıǵaq keshtirgenimen tamyryn tereńge jaıǵan tańsyq ólkede tynystary tarylmaǵandaryn ózderi jıi aıtady», deıdi ol. Sharýada shashaý shyǵarmaıtyn ákesi qııýyn qıystyryp, óz isin dóńgeletip áketse kerek, keıipkerimiz kóılegi kók, qaryny toq otbasynda ómirge kelgenin aıtady. «Semeı jurtyna birden baýyr basyp kettik. Bul keýdemizden ıtermeı, qushaq asha qarsy alǵan jergilikti jurttyń daladaı keń peıilinen bolsa kerek. Sondyqtan qıyn-qystaý shaqta qoldaý tanytqan semeılikterge aıtar meniń de alǵysym sheksiz. О́z balasynan kem kórmeıtin qala turǵyndaryna rızashylyqtan basqa alyp-qosarym joq. Qorshaǵan qarashanyń qaıyrymdylyǵynan bolar, meniń de Otanǵa degen mahabbatym sondaı ystyq. Sondyqtan buǵanam bekip, qabyrǵam qataıǵan tusta, belimdi bekem býyp, Ulttyq ulan qatarynda Otan aldyndaǵy boryshymdy óteýdi jón sanadym. Darqandyǵy dalasynan daryǵan qazaq jurtymen bitisip, beıbit eldiń aspanynda mamyrajaı kún kesheıik», dep aǵynan jaryldy Ibragım.
5511 áskerı bóliminiń qatardaǵy jaýyngeri Bekzat Shermatovtyń da qazaq halqyna aıtar alǵysy sheksiz. Onyń aıtýynsha, ata-anasy Qyrǵyz Respýblıkasynda týyp-óskenimen, keıin bala-shaǵanyń qamymen Qazaqstanǵa qonys aýdarypty. «Aýyl turǵyndary tabys tabý úshin Máskeýge sabylsa, al bizdiń otbasy Qazaqstandaǵy Pavlodar qalasyna taban tiredik. Bul sheshimdi ákem qabyldapty. Alǵashynda páter jaldap kúnelttik. Sodan keıin saýdamen aınalystyq. «Eńbek etseń emersiń» demekshi, eshkimdi tanymaıtyn ólkedegi tógilgen ter sońynda óz jemisin berdi. Búginde áke-sheshem Pavlodar qalasyndaǵy birneshe kásiptiń ıesi. Endi Astana qalasynan da kásip kózderin ashyp, elordaǵa oıysýdy josparlap júr», deıdi jaýynger. «Qazaqstan – múmkindikter mekeni» ekenin aıtqan ol: «Eger de óziń talpynsań, memleket árbir talpynysyńdy baǵalaıdy. Ejelden bir-birine etene jaqyn qazaq pen qyrǵyz dostyǵy jyl sanap artyp keledi. Sondyqtan birligimiz jarasqan jerde maǵynaly ǵumyr keshýdi Alla násip etkendeı. Qazaqstan otbasymdy aıaǵynan nyq turǵyzyp, ákemdi atpal azamatqa, anamdy isker áıelge aınaldyrdy», deıdi. Bótensip kelgen qyrǵyzdy keń qushaǵyna syıdyryp, qaıyrymdylyǵy men keńpeıildigi, danalyǵy men qonaqjaılyǵyn kórsetken Qazaq halqyna qurmeti joǵary ekenin sózben emes, ispen kórsetip júrgen jaýynger qazir áýletiniń áleýetin arttyryp, ósip-óngen eldiń shekarasyn jaýdan qorǵap, tynyshtyǵyn kúzetip júr.
6699 áskerı bóliminiń qatardaǵy jaýyngeri Ildar Gaınetdınovtiń ulty bashqurt bolǵanymen, ózi túgili, ákesiniń de kindik qany qazaq topyraǵynda, onyń ishinde Ekibastuz qalasynda tamǵan. Bashqurt pen qazaqtyń baýyrlastyǵy ǵasyrlar boıy jalǵasyn taýyp kele jatqanyn aıtqan ol: «Mysaly, Ýfadaǵy Ǵalııa medresesi talaı qazaq jastarynyń saýatyn ashqan. Bul qala Alashordaǵa bas qosar qutty oryn boldy. Álıhan Bókeıhan Orynbordy ortaq astana qylyp, bashqurt-qazaq birtutas avtonomııasyn qurmaqshy bolǵanyn da bireý bilse, bireý bilmes. Túrkitildes halyq bolǵan soń tilegimiz bir. Sondyqtan tilektes eldiń týyn tik ustaý – men úshin úlken abyroı», dedi.
Búginde Ulttyq ulannyń «Shyǵys» óńirlik qolbasshylyǵyna qarasty 6699 áskerı bóliminde el aldyndaǵy azamattyq boryshyn ótkerip júrgen Ildardyń jaýyngerlik mindeti – О́skemen qalasyndaǵy túzeý mekemelerin kúzetý. Qarýlastar arasynda daralanyp, kez kelgen áskerı synaqtan súrinbeı, qoıylǵan tapsyrmalardy der kezinde oryndaýǵa árdaıym baryn salyp júrgen ol týǵan eline degen sheksiz qurmetin osylaı dáleldep keledi.