Búgin Alash arysy Álıhan Nurmuhameduly Bókeıhannyń týǵanyna 158 jyl tolýyna oraı, Alash.kz ulttyq portalynyń uıymdastyrýymen Astanadaǵy Qalamgerler alleıasynda ornalasqan «Alash qaıratkerleri» eskertkishine gúl shoǵyn qoıý rásimi ótti, dep jazady Egemen.kz.
Saltanatty is-sharaǵa «Ardagerler uıymy» RQB ortalyq keńes tóraǵasynyń birinshi orynbasary О́mirzaq Ozǵanbaev, memleket jáne qoǵam qaıratkeri Álıhan Báımenov, alashtanýshy ǵalym, jazýshy Tursyn Jurtbaı, Álıhannyń shyraqshysy, ólketanýshy Tuńǵyshbaı Muqan, qoǵam qaıratkeri, aqyn Kópbolsyn Bekmaǵanbet, alashtanýshy ǵalym Qaıyrbek Sádýaqasov, zańger-quqyqtanýshy, pýblısıst Naqypbek Sádýaqasov, «AMANAT» partııasy Astana qalalyq fılıaly atqarýshy hatshysynyń mindetin atqarýshy Muhamedjan Bolysbek, «Aq jol» demokratııalyq partııasynyń ókilderi, Astana qalalyq máslıhat depýtattary, Alash arysynyń Aqtoǵaılyq jerlesteri, zııaly qaýym ókilderi, qoǵamdyq uıym jetekshileri, BAQ ókilderi, Á.Bókeıhan atyndaǵy №76 mektep ujymy men oqýshylary jáne zııaly qaýym ókilderi qatysty.
Eskertkishke gúl shoqtaryn qoıý rásiminiń aldynda elimizdiń birneshe qurmetti azamattaryna sóz berildi.
«Tóre tuqymynda qazaqtyń qaqy bar, tiri bolsam qazaqqa qyzmet jasamaı qoımaımyn», degen Álıhan Bókeıhanovty qandaı da bir azap ta moıyta almaǵanyn tilge tıek etken ardager О́mirzaq Ozǵanbaev: «Ulylarymyzdy ulyqtaý eldiktiń belgisi. Álıhan Bókeıhanovty ulyqtaý elimizdiń aýmaǵynda jalǵasady. Uly adam árýaǵymen jelep-jebep jatqaı», dedi.
Alashtanýshy ǵalym Tursyn Jurtbaı ult kóseminiń ustanymdary týraly toqtalyp ótti:
Eń birinshi – Alash ulttyq demokratııalyq memleket bolý tıis. Ol úshin eń aldymen «jer, jer jáne jer» bolýy kerek. Jersiz Otan joq. Bókeıhanovtyń uıǵarymy boıynsha qazaqtyń baıyrǵy jerin qashan qazaqtyń ózi ǵylym men tehnıkaǵa súıenip, tolyq ıgermeıinshe, jer jekemenshikke, qonys aýdarýshylarǵa berilmeýi kerek. Ekinshi ustanymy – Alash jeriniń ústindegi, astyndaǵy, kógindegi barlyq baılyq qazaqa qyzmet etýi tıis. Iаǵnı, Bókeıhanovtyń sózimen aıtqanda, «qazaqtyń árbir tasy qazaqtyń óńirine túıme bolyp taǵylýy tıis». Úshinshi ustanymy – qazaq jerinde óndirilgen ár bir ýys jún sol memlekettiń azamattarynyń ústine toqyma bolyp kıilýi kerek. Iаǵnı, memleket tolyqtaı ekonomıkalyq táýelsizdikke qol jetkizýi tıis bolǵan. Tórtinshi ustanymy – qazaq memleketinde memleket qurýshy ulttyń tili, dini, mentalıteti ózge ultarǵa qaraǵanda ústem bolýy kerek degenge saıady. Bul ıdeologııalyq ustanym bolatyn. Japonııa úlgisindegi ulttyq demokratııalyq memleket qurylýy kerek.«Keńes úkimeti qansha qyssa da, sol kezeńde de Alash qozǵalysy toqtaǵan joq, qar astyńdaǵy kóktemgi qyzyl sý sııaqty júrip jatty. Sondyqtan Alash ıdeıasy – máńgilik ıdeıa!», dep túıindedi sózin Tursyn Jurtbaı.
Is-shara barysynda Álıhan Báımenov te sóz sóıledi.
«Qazaqtyń bodan bolǵan eń tómengi kezeńinde dúnıege kelgen uly Abaıdyń ıdeıalaryn Álıhan Bókeıhan bastaǵan alash qaıratkerleri saıası deńgeıde jalǵastyryp keldi. Olar búgingi kúngi boıymyzdaǵy táýelsizdikti nyǵaıtýǵa degen umtylystyń negizin qalap, ultty qaıtadan jandandyrdy. Qazir biz osy kisiler armandaǵan memlekette ómir súrip jatyrmyz», dedi Álıhan Báımenov.
Jınalǵan qaýym eskertkish taqtaǵa gúl shoqtaryn qoıyp, estelik sýretke tústi.
Ult kósemin ulyqtaý is-sharasy Álıhan Bókeıhan atyndaǵy №76 JBO mektep-lıseıi ǵımaratynda jalǵasyn tapty.
Áýeli, mektep ákimshiligi ult kósemine arnalǵan mýzeı ishine saıahat uıymdastyryp, qonaqtarǵa tanymdyq-aqparttyq maǵlumattar berildi. Sodan soń, oqýshylardyń shaǵyn konserttik baǵdarlamasy tamashalandy.
Odan bólek «Rýhanı taǵzym» atty suhbat-kezdesý ótip, oǵan alashtanýshy ǵalym, jazýshy Tursyn Jurtbaı, Álıhannyń shyraqshysy, ólketanýshy Tuńǵyshbaı Muqan, Qazaqstannyń Qurmetti jýrnalısi, jazýshy, Oralbek Júnisuly, L.Gýmılev atyndaǵy EUÝ qazaq ádebıeti kafedrasynyń professory, fılologııa ǵylymdarynyń doktory, alashtanýshy ǵalym Saǵymbaı Jumaǵul, Halyqaralyq Jazýshylar Odaǵynyń múshesi, aqyn Ardaq Qaıyrqyzy, «AMANAT» partııasy Astana qalalyq saıası bóliminiń konsýltanty, aqyn Ábdiǵanı Bázilhanuly, «Aqjol» partııasynyń Qaraǵandy qalalyq máslıhatynyń 7-shi shaqyrylymynyń eks-depýtaty Beıbit Ospanuly, «Qazaq» radıosynyń ardager dıktory Kúlásh Moldahmetova, ult kóseminiń týǵan jeri Aqtoǵaıdan kelgen zeınetker ustaz Nazıma Baıserkına qatysyp, oqýshylar men qonaqtarǵa Álıhan Bókeıhan týraly áńgimelep, rýhanı áser ústedi.
Is-shara «Álıhan Bókeıhan – ult-azattyq kúreskeri» atty tanymdyq derekti fılmdi tamashalaýmen aıaqtaldy.