Rejısser Rınat Balǵabaevtyń «BUU-áıelder» qurylymynyń qoldaýymen túsirilgen «Gorgona» derekti fılminiń kórsetilimi mıllıon qaralym jınaǵan. Bul týraly Astanada ótken baspasóz máslıhatynda aıtyldy. Týyndy búgingi qoǵamnyń ózekti taqyrybyna aınalǵan seksýaldyq zorlyq-zombylyq máselesin qaýzap qana qoımaı, taǵdyry uqsas keıipkerlerdiń boıyndaǵy ózine degen senimdilikti arttyrýǵa úndeıdi.
Aldyńǵy aıda ǵana shyqqan derekti fılm áleýmettik jelilerde qoǵamdyq rezonans týdyrǵan. Jarııalanǵan kúnnen beri mıllıon ret qaralyp, túrli saryndaǵy pikirler toqtaýsyz kelip jatyr. Sebebi fılmdegi keıipkerler – óz basynan ótkizgen qıyn taǵdyryn kópshilikke jetkizýge batyly jetkender. Túsirilimge keıipkerlermen qatar Qazaqstanda genderlik jáne turmystyq zorlyq-zombylyqqa qarsy kúres salasynda jumys isteıtin sarapshylar da qatysyp, máseleniń túp-tórkinin túsindirýge tyrysady. Basty maqsat – zorlyq-zombylyqty bastan keshirgen keıipkerlerdiń shynaıy oqıǵasyn kórsetip, kórermenge oı salý. Al fılmniń ataýyna áleýmettik jelilerdegi tanymal trend negiz bolǵan eken. Osydan eki jyl buryn álem boıynsha myńdaǵan qyz zorlyq-zombylyq kórgenin kórsetý úshin Gorgon Medýzasynyń sýretin jarııalady.
Qazaqstandaǵy «BUU-áıelder» qurylymynyń keńse basshysynyń mindetin atqarýshy Dına Ámrishevanyń aıtýynsha, óz oqıǵalaryn bólisken keıipkerler – zorlyq-zombylyq kórgenderdi únsiz qalmaýǵa jáne qoǵamdy genderlik zorlyq-zombylyqty joıý úshin birigýge shabyttandyratyn batyl áıelder. Bul fılm áıelder quqyǵy úshin kúreste jáne zorlyq-zombylyqtyń barlyq túrin joıýda mańyzdy aqparattyq-nasıhattyq týyndy bolmaq. Sondaı-aq ol: «Zorlyq-zombylyqty aqtaýǵa bolmaıdy. Fılmge túsken árbir keıipker bizdiń qoǵamdaǵy barsha áıelge batyldyq syılaı aldy. Zorlyq-zombylyqtyń túp-tórkini otbasyndaǵy tárbıe men jaýapkershilikte. Bizdiń qoǵam nazaryna usynyp otyrǵan fılmge qatysty oı-pikirin bildirip jatqandardyń kóbi ádettegideı qyz-kelinshekter. Olardyń úlesi 70 paıyz bolsa, qalǵan 30-y er adam. Osynyń ózi bizdiń keıipkerlerimiz basynan ótkergen qıyn jaǵdaıdy jáne ómirlik oqıǵany júrekke jaqyn qabyldap, túsinýge tyrysatyn, batyldyq tanytýǵa shaqyratyn erkekterdiń de bar ekenin kórsetip otyr», deıdi.
Fılm rejısseri ári prodıýseri Rınat Balǵabaevtyń sózinshe, qoǵamda zorlyq-zombylyqtyń qurbany bolǵandar statıstıkada keltirilgen sannan áldeqaıda kóp. Sebebi qoǵamnyń zorlyq qurbanyna degen kózqarasy sógý men aıyptaýdan turady. Odan qalsa eldegi zań normalary álsiz. Kóptegen qylmystyq is sotqa jetpeıdi, al jetkender quqyq qorǵaý júıesinde jıi qıyndyqtarǵa tap bolady, sonyń ishinde tergeýdiń jetkiliksizdigi jáne birjaqty kózqaras qalyptasyp qalǵan. Sondyqtan jábir kórgender bastan ótkizgen aýyr azapty aýzynan shyǵarmaı, jyldar boıy jasyryp qalýǵa tyrysady. Máselen, fılmdi túsirý barysynda prodıýser júzge jýyq oqıǵany qarap shyǵyp, túsirilimge on eki keıipkerdi shaqyrtqan. Alaıda sońǵy sátte kóbi qoǵamnyń kózqarasynan qorqyp, sheshimderin ózgertken. «Seksýaldyq zorlyq-zombylyqtan aman qalǵandardy qoldaý empatııa men adamgershilik máselesi ǵana emes, qoǵamdyq sananyń jetilýin, ádilettilik pen teńdik jaǵynda turýǵa daıyndyǵyn kórsetedi», deıdi fılm avtory.
BUU-nyń dereginshe, Qazaqstanda jyl saıyn árbir altynshy áıel zorlyq-zombylyqqa ushyraıdy. Munyń sebebi kóp. Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen fılmdi túsirýshiler men qoldaý kórsetkenderge qoǵamnyń sanasyna silkinis jasap, zorlyq-zombylyqqa nóldik tózimdilikti arttyrý baǵytyndaǵy jumysy úshin alǵysyn bildirdi. Onyń aıtýynsha, statıstıkanyń artýyna qoǵamnyń kózqarasy, zań normalarynyń oryndalmaýy, quqyq qorǵaý organdarynyń ádiletsizdigi de sebepshi bolyp otyr. Sol sebepti on ekide bir gúli ashylmaǵan búldirshinder zorlyq-zombylyqqa túsip, qyzdarymyzdyń qanaty erte qaıyrylyp, taǵdyry talqandalyp jatyr. Al qoǵamdaǵy bul keleńsizdikti toqtatý úshin kúshimizdi bir arnaǵa toǵystyryp, jumyla jumys isteý kerek ekenin aıtqan ol: «Otbasyndaǵy zorlyq-zombylyq komıssııanyń kún tártibinde turǵan máselege aınaldy. Qazir Parlamentte qaralyp jatqan áıel quqyǵy men bala qaýipsizdigi týraly zań jobasy kóp kidirtýge bolmaıtyn, endi shegerýge kelmeıtin qujat bolýǵa tıis. Sebebi zań jobasy keıingi jyldary qoǵam qarsylyǵy men talqylaýynan da ótti. Tórt jyl buryn bul zańdy qabyldaýǵa bastamashy bolǵandardyń biri ózim edim. Qujatta birneshe zań normasyn qatańdatýǵa baılanysty usynystar bar. Máselen, uryp-soǵý jáne densaýlyqqa jeńil-jelpi zııan keltirgeni úshin jaýapkershilikti qylmystandyrý, pedofılderdi ómir boıyna bas bostandyǵynan aıyrý, óz-ózine qol jumsaýǵa kóndirý nemese járdemdesýdi nasıhattaǵandarǵa qylmystyq jaýapkershilikti engizý sekildi birqatar batyl norma engizilip otyr. Biraq zańdy qataıtý máseleni tolyq sheshpeıdi. Sondyqtan otbasyn qoldaý keshendi túrde júrý kerek. Bul boıynsha da ulttyq komıssııa birqatar baǵdarlama engizip, jumys istelip jatyr», deıdi.
Ulttyq komıssııa ókili sózin: «Adamdyq qasıettiń azaıǵan jerinde zorlyq-zombylyqtyń shekarasy bolmaıdy. Sondyqtan qylmysqa qarsy kúres qoǵamdyq jumysqa aınalýǵa tıis. Sonda ǵana qazaq qyzynyń kóz jasy naqaqtan naqaq tógilmeıdi», degen pikirmen qorytty.