Senator Ǵalıasqar Sarybaev óziniń depýtattyq saýalynda Qazaqstannyń qolda bar ǵaryshtyq áleýetin saqtaý jáne zymyran ǵylymyn damytý jóninde pármendi sharalar qabyldaýǵa shaqyrdy, dep habarlaıdy Egemen.kz Senattyń baspasóz qyzmetine silteme jasap.
Senatordyń aıtýynsha, «Baıqońyr» ǵarysh aılaǵy – Qazaqstannyń mańyzdy ǵarysh resýrsy, alaıda aeroǵarysh ónerkásibindegi kúrdeli jaǵdaıǵa baılanysty onyń damýyna qaýip tónip tur. Ǵarysh salasyn damytý problemalaryn sheshý Qazaqstan Úkimetiniń basty mindeti bolýy tıis. Ǵarysh salasyn damytýdyń memlekettik baǵdarlamalary 2014 jyldan keıin jalǵasyn tappaǵan. Sondyqtan atalǵan saladaǵy memlekettik saıasatty qaıta qaraý jáne uzaq merzimdi damý tujyrymdamasyn ázirleý kerek.
«Ǵarysh salasyn qarjylandyrýdyń ádis-tásilderin qaıta qaraý qajet. 2025 jylǵa osy jobalar boıynsha bıýdjette kózdelgen qarjy bolmaǵandyqtan ǵylymı-zertteý jáne tájirıbelik-konstrýktorlyq jumysta buryn bastalǵan jobalardyń aıaqtalmaı qalý qaýpi bar. Biregeı qurastyrý-synaý keshenin jyl saıyn kútip-ustaýǵa qajetti qarjy bólinbeı qalǵan. Qarjylandyrýdyń jetkiliksizdigi KazSat tobyn odan ári damytý jónindegi naqty strategııany aıqyndaýǵa múmkindik bermeıdi. Shuǵyl sharalar qabyldanbasa, KazSat-3R spýtnıgin ǵaryshqa shyǵarý toqtatylady», dedi Ǵalıasqar Sarybaev.
Senator sońǵy jyldary bizdiń ǵarysh aılaǵymyzǵa suranys tómendep bara jatqanyn, sondyqtan Qazaqstan «Soıýz-5» jańa zymyran tasyǵyshyn paıdalana otyryp «Báıterek» jobasyn iske asyrýdy bastaǵanyn atap ótti.
«Alaıda, geosaıası jaǵdaıǵa baılanysty joba qazirgi ýaqytta úziliske dýshar boldy. Baıqońyr ǵarysh aılaǵynyń belsendiligin saqtaý úshin jańa jumys oryndaryn ashý jáne mamandardyń quzyretin arttyrý, sondaı-aq basqa da biregeı zymyran keshenderi men ǵarysh ınfraqurylymyn paıdalaný jáne «Báıterek» jobasyn iske asyrýdy jalǵastyrý qajet», dep túıindedi Senat depýtaty.