Senator Gennadıı Shıpovskıh Soltústik Qazaqstan oblysyndaǵy gýmanıtarlyq kómek qabyldaý pýnktterin jáne evakýasııa ortalyqtaryn aralady. Depýtat turǵyndarmen kezdesý barysynda shyǵyndy óteý erejesi turǵysynda jáne memlekettik qoldaý kórsetý týraly kóptegen suraqtarǵa jaýap berdi. Ol zardap shekkenderge kómek kórsetýge atsalysqan eriktilerge alǵysyn bildirdi. Sondaı-aq tótenshe jaǵdaıda tıimdi áreket etý jáne zardap shekkenderdiń ómirin qalpyna keltirýge kómektesý úshin barlyq taraptyń kúsh-jigerin biriktirý qajettigin atap ótti, dep habarlaıdy Egemen.kz Senattyń baspasóz qyzmetine silteme jasap.
Depýtat Nurlan Bekenov Aqmola oblysynyń Shortandy aýdanyna qarasty Damsa aýylyndaǵy tasqyn sýǵa daıyndyq jumysynyń jaı-japsarymen tanysty. Eger bóget kútpegen jaǵdaıda buzylatyn bolsa, paıdalanylatyn balama jáne aınalma joldar bar. N.Bekenov aýdandaǵy ahýaldyń turaqtylyǵyn jáne sý tasqyny saldaryn joıý jumystary óz deńgeıinde júrgizilip jatqanyn atap ótti.
Senatorlar Ǵalıasqar Sarybaev, Álisher Satvaldıev jáne Bıbigúl Jeksenbaı «Astana» mańyndaǵy qarsy retteýshi sý qoımasynda boldy. Atalǵan qoıma arqyly – qaladan tasqyn sý ótkiziledi jáne qala yqtımal tasqyn sýdan qorǵalady. Sý deńgeıiniń kóterilýi jáne tasqyn sýdyń qala ınfraqurylymyna áserine baılanysty qaýipke oraı astanalyqtardyń ótinishi saparǵa sebep bolǵan edi. Nysandy aralaý barysynda sarapshylar qazirgi ýaqytta elordany sý basý qaýpi joq ekenin, ahýal ákimdiktiń baqylaýynda turǵanyn jáne qarsy retteýshiniń qalypty jumys istep turǵany týraly senatorlarǵa aıtyp berdi. Depýtattar kezdesý barysynda tótenshe jaǵdaıǵa baılanysty jedel áreket etý jáne monıtorıng júıesin odan ári jetildirý qajettigine toqtaldy.