El boıynsha sý tasqynymen kúreske belsendi qatysyp jatqan eriktiler sany 43 myńnan asty. Olardyń kúshimen 6 640 tonnaǵa jýyq gýmanıtarlyq kómek jınaldy, onyń 4 048 tonnasy «qyzyl» aımaqtarǵa jetkizildi jáne zardap shekken halyqqa taratyldy. Eriktiler halyqty evakýasııalaýǵa, gýmanıtarlyq kómek jınaýǵa jáne taratýǵa, bógetterdi kúsheıtýge, sondaı-aq ystyq tamaqpen qamtamasyz etýge qatysyp, sý tasqynynan zardap shekken azamattarǵa kómek kórsetip júr, dep habarlaıdy Egemen.kz Mádenıet jáne aqparat mınıstrliginiń baspasóz qyzmetine silteme jasap.
Aqtóbe oblysynda volonterlerdiń birligi men kúshiniń arqasynda 308 tonna azyq-túlik, 85 tonna azyq-túlik emes qajetti taýarlar jáne 223 kılogramm dári-dármek evakýasııalyq pýnktterge bólindi. 10 myńǵa jýyq qutqarýshy men evakýasııalanǵan turǵyndar úshin ystyq tamaq uıymdastyryldy.
Atyraý oblysynda eriktiler shtaby shuǵyl rejımde jumys istep tur. Sý tasqynyna qarsy is-sharalarǵa 13 myńnan astam volonter jumyldyryldy. Gýmanıtarlyq kómek qabyldaý pýnktinde osy kúni 1 390 tonnadan astam taýar jınaldy. Atyraý qalasynda bógetti kúsheıtý úshin 107 pýnkt ornatylǵan. Bóget turǵyzý jumystary táýlik boıy júrgizilip jatyr. Batys Qazaqstan oblysyndaǵy qutqarý jumystaryna 8 000 volonter qatysty. Kómek jınaý pýnktterinde 415 tonna gýmanıtarlyq kómek jınaldy. Qostanaı oblysynda 3 500-den astam erikti turǵyndardy evakýasııalaý jumystaryna qatysty. Shymkentke 1 500-ge jýyq volonter jumyldyrylyp, olardyń bir bóligi zardap shekken óńirlerge jol tartty.