Dana halqymyzda «Birligi joq el tozady, birligi kúshti el ozady» degen bar. Tarıh kóshinde taǵdyr aıdap topyraǵymyzǵa taban tiregen ártúrli etnos ókilderi elimizde máńgilikke turaqtap qaldy. Qasıetti mekenimizde yntymaq, tatýlyq, birliktiń arqasynda túri, tili, dini bólek jandar bir úıdiń balasyndaı baqytty ǵumyr keship jatyr.
Olardyń arasynda týystyq qatynas quryp, bir otbasy bolǵandary kóp-aq. Solardyń biri – 6698 áskerı bóliminde qyzmet atqaryp júrgen tájik ultynyń ókili, aǵa serjant Hamza Shakarov. Onyń otbasynda ózge ultpen týysqan bolǵan ózi ǵana emes, inisi de bar, ol nemis ultymen aralas ózbek qyzyn ózine jar etken. Sondyqtan da bul otbasyn birligi men berekesi jarasqan otbasy deýge bolady.
Aǵa serjant Hamza Shakarov Jetisaı aýdanynda dúnıege kelgen. Otbasynda inisi, aǵasy, qaryndasy bar. Atasynyń aıtýynsha, ata-babasy О́zbekstannyń Jızaq degen qalasynda turǵan. Soǵystan keıin, 50-jyldary Qazaqstannyń Jetisaı aýdanyna qonys aýdarǵan. 1999 jyly V.Tereshkova atyndaǵy orta mektepti aıaqtap, 2000 jyly Taldyqorǵan qalasyndaǵy Qorǵanys mınıstrligine qarasty 18404 áskerı bóliminde merzimdik áskerı qyzmetin óteıdi. Al 2006 jyly Shymkent qalasyndaǵy 6506 áskerı bóliminiń atqyshtar batalonynda kelisimshart boıynsha qyzmetin bólimshe komandıri bolyp bastaıdy. Keıinnen qaraýyl bastyǵynyń kómekshisi, kúzettiń ınjenerlik-tehnıkalyq quraldary mamany qyzmetine aýysady. Týra bir jyldan keıin, 2007 jyly jary Uljanmen tanysady. О́mirin ónermen baılanystyrǵan skrıpkashy qazaq qyzymen tanystyǵy úlken mahabbatqa ulasyp, 2008 jyly otbasyn qurady.
«Alǵashynda ultymyzdyń ártúrli bolýyna baılanysty árqaısysymyzdyń ata-anamyz úılenýimizge qarsy bolǵany ras. Alaıda bir-birimizge degen senim men mahabbatymyz bárin jeńdi. Ata-anamyz batalaryn berip, 2008 jyly bas qostyq. Biz salt-dástúrge kelgende bólinbeımiz, bastysy – dinimiz, senimimiz bir, eki ulttyń da joralǵylaryn jasap, syılastyqpen qarap, tatý-tátti ómir súrip kelemiz. Uljannyń úıinde qazaqtyń saltyn jasasaq, úıimizde tájik halqynyń dástúrin ustanamyz», deıdi Hamza. Búginde birligi jarasqan shańyraqta Aırýza, Káýsar, Dinmuhamed esimdi ul-qyzdar ósip keledi. Otbasynyń barlyq múshesi tájik, qazaq tilinde erkin sóılep, qatynas jasaıdy.
«Tájik jáne qazaq tilinde erkin sóılese beremiz. Úlken qyzyma qazaqsha «Aı», tájikshe «Rýz» degen sózderden quralǵan aı men kún degen maǵynany bildiretin Aırýza esimin berdik. Al ulymyzdyń esimin elimizdiń ósip-órkendeýine úlken úles qosqan tarıhı tulǵa Qonaev atamyzdyń qurmetine, sol kisideı elge qyzmet etsin dep Dinmuhamed dep atadyq», deıdi jary Uljan.
Otbasynyń birligi – senim men syılastyqtyń úlgisi. San túrli etnos ókiline saıa bolǵan keń-baıtaq jerimizdegi yntymaq, tatýlyq, janashyrlyq, meıirimdilik sekildi asyl qasıettiń jyldar boıyn jalǵasyp kele jatqany da birliktiń týyn bıik ustaýdan bastalatynyn ańǵartsa kerek.