Senator Darhan Qydyráli QR Premer-mınıstri Oljas Bektenovke joldaǵan depýtattyq saýalynda memleket tarıhyna baıyppen qarap, Alash arystaryn ulyqtaý týraly oılaryn ortaǵa saldy. Atyraýda ótken Ulttyq quryltaıda Memleket basshysynyń tulǵalardy bir-birine qarsy qoımaý týraly sózin eske salǵan senator el birligi úshin zııalylardyń da aýyzbirshiligi shart ekenin aıtty, dep habarlaıdy Egemen.kz Senattyń baspasóz qyzmetine silteme jasap.
«Bıyl qazaq jeriniń tutastaı bir respýblıkaǵa birigip, elimizdiń qazirgi shekarasynyń aıqyndalǵanyna júz jyl – bir ǵasyr tolyp otyr. Memleketimizdiń tutastyǵy úshin bul mańyzdy oqıǵa eleýsiz qalmaýy tıis. Álıhan Bókeıhan, Ahmet Baıtursynuly, Mirjaqyp Dýlatuly, Álimhan Ermekov sekildi alash qaıratkerleri bastaǵan tarıhı prosesti sol kezde bılikte bolǵan Turar Rysqulov, Sultanbek Qojanov, Seıitqalı Meńdeshev, Sanjar Asfendııarov, Temirbek Júrgenov, Jalaý Myńbaev sııaqty tulǵalar aıaqtap shyqty. Qazaq atyn qaıtarǵan Sáken Seıfýllın men asharshylyqqa qarsy kúresken alash qaıratkerlerin qamqorlyqqa alǵan Turar Rysqulovty qur kommýnıst aty nemese ózin qorǵaý maqsatynda jazǵan haty úshin jazǵyrý – ábestik», dedi senator.
Tulǵalar týraly sóz qozǵaǵanda ádepten ozbaý týraly aıtqan senator barymyzdy baǵalaý, irilerdi alalamaý týraly atap ótti. Alash arystary atqarǵan uly isterdi búgingi urpaq izgi istermen jalǵastyryp otyrýy tıis. 2000 jyly aǵa urpaq ókilderi bastamasymen Halyq sharýashylyǵy ınstıtýty Ulttyq ekonomıkalyq ýnıversıtetke aınalyp, oǵan Rysqulovtyń esimi berilgen edi. Keıin oqý orny jekemenshikke ótip, T.Rysqulovtyń atyn alyp tastady. Senator Úkimet qaýlysyna sáıkes berilgen ataýdy JOO qandaı basqarý túrine jatatynyna qaramaı, aýystyrýǵa quqy joq ekenin atap ótti.
«Bıyl Sáken Seıfýllın, Ilııas Jansúgirov, Beıimbet Maılın, Turar Rysqulov, Sultanbek Qojanovtyń týǵanyna 130 jyl tolyp otyr. Tuǵyrly tulǵalardyń mereıtoılaryn dańǵazasyz, taǵylymdy etip atap ótý kerek. Bul rette onomastıka máselesine de nazar aýdarý qajet. Shekaramyzdy aıqyndaýǵa aıryqsha úles qosqan Álimhan Ermekov sııaqty tulǵalar eleýsiz qalmaýy tıis. Alash arystarynyń kóbi qaıda jerlengeni belgisiz. Jýyrda Almaty irgesindegi Jańalyq aýylynda saıası repressııaǵa ushyraǵan 163 adamnyń súıegine zertteý júrgizilip, genetıkalyq taldaý arqyly 50 adamnyń deregi anyqtaldy. Qarajat bólinse, osyndaı ádis arqyly Ahmet Baıtursynuly, Ilııas Jansúgirov sekildi tulǵalar týraly derekter naqtylanar edi», dedi Senat depýtaty.
D.Qydyráli depýtattyq saýalynda qaraýsyz jatqan Qandysaıǵa nemese Jańalyq aýylyna Ata-Beıit sııaqty irgeli keshen turǵyzý – perzenttik paryz ekenin atap ótti.