Senat Tóraǵasy bastaǵan Palatanyń bir top depýtaty Astana qalasy ortalyqtandyrylǵan kitaphanalar júıesiniń qyzmetimen tanysty. Qazirgi tańda atalǵan júıe 22 kitaphanany biriktiredi. Senatorlar oqý zaldaryna arnaıy baryp, kitap qoryna nazar aýdardy. Sondaı-aq olar kitaphana qyzmetkerlerimen birge elimizde bul salany damytý jáne halyqtyń kitap oqýǵa degen qyzyǵýshylyǵyn arttyrý máselelerin talqylady, dep jazady Egemen.kz.
О́z sózinde Máýlen Áshimbaev qoǵamda durys qundylyqtardy dáripteý, oqý mádenıetin qalyptastyrý jáne bilim berý salasyn ilgeriletý baǵytynda kitaphanalardyń atqaratyn róli zor ekenin atap ótti. Sondaı-aq Palata Spıkeri osy saladaǵy ózekti máselelerge de toqtalyp, búginde olardy sheshý jolynda barlyq deńgeıde júıeli jáne keshendi jumys júrgizilip jatqanyn aıtty.
«Prezıdentimiz Qasym-Jomart Kemeluly Toqaevtyń bastamasymen sońǵy jyldarda elimizde kitaphanalardy damytý, bul baǵytta jańa, kreatıvti jobalardy iske asyrý jumystary júrgizilip jatyr. Sonyń aıasynda Astana men Almatyda táýlik boıy jumys isteıtin zamanaýı kitaphanalar salynady. Ulttyq kitap kúnin bekitý máselesi de talqylanyp jatqany belgili. Sondaı-aq búginde «Aýyl kitaphanalaryna 100 kitap» atty aksııa ótkizilip jatyr. Bul bastamaǵa senatorlar da úles qosyp jatyr», degen Máýlen Áshimbaev el erteńine beıjaı qaramaıtyn azamattardy jańa aksııaǵa ún qosyp, oǵan belsendi qatysýǵa shaqyrdy.
Sonymen qatar Senat Tóraǵasy kitaphanashylardyń mártebesi men bedelin arttyrý máselesiniń mańyzdy ekenin aıtty. Búginde mektep kitaphanashylary Pedagog mártebesi týraly zańda qarastyrylǵan jeńildikter men qoldaýdyń ıgiligin kóre almaı otyrǵanyn eskersek, bul ózekti problema ekeni anyq.
Kezdesýde elordadaǵy Ortalyq balalar jáne jasóspirimder kitaphanasynyń qyzmeti týraly da sóz boldy. Onda shyǵarmashylyq kezdesýler ótkizetin zal, kovorkıng ortalyq, ólketaný sektory jáne kitap oqýǵa jeteleıtin basqa da tyń bastamalar qarastyrylǵan.
Aıta keteıik, Ortalyq balalar jáne jasóspirimder kitaphanasy 1975 jyldan beri jumys istep keledi. Ol – Astanadaǵy eń iri kitaphanalardyń biri. Kitap qorynda 167 myń kitap bar. Al oqyrmandar sany 8000 adamǵa jetedi. Byltyr júrgizilgen jóndeý jumystarynyń nátıjesinde kitaphananyń materıaldyq-tehnıkalyq bazasy men jıhazdary jańǵyrtyldy. Sondaı-aq nysannyń qasbeti jańaryp, joǵary jyldamdyqty ınternetpen qamtyldy.