Batyrlar rýhy – tálim-tárbıe qaınary

Erlik pen batyrlyqty dárip­te­gen is-sharany «Atamnyn Amanaty» qoǵamdyq birlestigi men Qorǵanys mınıstrligi uıym­das­tyrdy.

Qorǵanys mınıstrligi Tárbıe jáne ıdeologııalyq jumys departamenti ókilderi, Qarýly kúshter ardagerleri, Ulttyq qorǵanys ýnıversıteti, áskerı kafedralar, oqý oryndarynyń alǵashqy áskerı daıarlyq páni oqytýshylary, S.Nurmaǵambetov pen R.Qoshqarbaevtyń týys­tary­nyń kezdesýi dóńgelek ústel formatynda uıymdastyryldy.

Otyrysta elordalyq Eýra­zııa ulttyq ýnıversıteti, Qazaq tehnologııa jáne bıznes ýnı­versıteti janyndaǵy kol­ledj­derdiń, Kólik jáne kom­mý­nıkasııa joǵary kol­led­ji­­niń, M.Jumabaev atyn­da­ǵy Ha­lyq­aralyq kolledjdiń jáne Ǵ.Myrzaǵulova atyndaǵy «Dana­lyq» joǵary medısınalyq kol­ledjiniń stýdentteri baıan­da­ma jasady. Olar Keńes Oda­ǵy­nyń batyrlary – Ysqaq Ybyraev, Leonıd Beda, Súndetqalı Esqa­lıev jáne Ánýar Ábý­táli­pov­tyń jaýyngerlik joly men erligi jaıly aıtyp berdi.

– Bıyl biz qazaq halqynyń kórnekti uldary – Keńes Oda­­ǵynyń batyry, táýelsiz Qazaq­stannyń birinshi Qorǵanys mınıstri, Halyq qaharmany, armııa generaly Saǵa­dat Nur­ma­ǵambetovtiń jáne Halyq qaharmany Raqymjan Qosh­qar­baevtyń júz jyldyǵyn atap ótýdemiz. Ýaqyt bizden beı­bit­shilik pen bostandyq jolynda halyq basynan ótkergen surapyl soǵys jyldarynyń aýyrtpalyǵynan, Táýelsizdik alǵannan keıingi alǵashqy qıyn­dyqtardan alshaqtatyp barady. Aǵa býynnyń jasaǵan uly isteri tarıh enshisinde. Osy tynymsyz ýaqyt aǵymynda keshegi men búgingini baılanystyrýshy dáne­kerdi saqtaı bilý – paryzymyz, – dedi «Qarýly kúshterdiń ardagerleri» RQB tóraǵasynyń orynbasary, otstavkadaǵy general-maıor Marat Naǵumanov.

Kezdesý barysynda dóńgelek ústeldiń ózge de qatysýshylary sóz sóıledi. Saǵadat Nurma­ǵam­betovtiń nemeresi Lıra Tal­ǵat­qyzy men Raqymjan Qoshqar­baev­tyń nemeresi Dáýren Janat­uly da atalary jaıly este­likterimen bólisti.

Is-shara sońynda dóńgelek ústel otyrysynda sóz sóılegen ko­l­ledj stýdentterine sertı­fı­­kattar tapsyrý rásimi ótti. Sony­men qatar Astana qala­sy­nyń kolledjderi arasynda «Batyr baba tarıhy» zııatkerlik oıy­nynyń úzdik qatysýshylary anyq­taldy. Birinshi oryndy M.Jumabaev atyndaǵy Halyq­ara­lyq kolledjdiń bilgirleri, ekinshi oryndy Servıs jáne týrızm kolledji, úshinshi oryndy Ǵ.Myrzaǵulova atyndaǵy «Dana­lyq» joǵary medısınalyq kol­led­jiniń «Alash» komandasy ıelendi.