Asqar Qulybaevtyń ıeligindegi munaı termınaly memleket menshigine qaıtaryldy, dep habarlaıdy Egemen.kz Bas prokýratýranyń baspasóz qyzmetine silteme jasap.
Almaty qalasy prokýrorynyń talap-aryzy boıynsha Aqtaý halyqaralyq teńiz saýda portynyń akvatorııasynda ornalasqan, quny 66 mln AQSh dollary bolatyn aýdany 134 gektar munaı termınaly memleket menshigine qaıtaryldy.
«Talap-aryz Asqar Qulybaevqa tıesili kompanııanyń sheteldik ınvestordyń menshigin zańsyz alyp qoıýy nátıjesinde keltirilgen zalaldy óteý maqsatynda berilgen», dep habarlady prokýratýra.
Anyqtalǵandaı, 2011 jyly munaı termınaly Qulybaev kompanııasynyń menshigine alynǵan. 2024 jyldyń 26 aqpanynda Mańǵystaý oblysy Mamandandyrylǵan aýdanaralyq ekonomıkalyq sotynyń sheshimimen Almaty qalasy prokýrorynyń talap-aryzy qanaǵattandyryldy, munaı termınaly memleket menshigine qaıtaryldy, sot aktisi zańdy kúshine endi.