Saıdyń tasyndaı sarbaz san túrli jaǵdaıǵa saqadaı saı. Syptyǵyr bolmysy shıryqqan ol synaptaı syrǵyǵan ýaqytta siltideı tynyp, Otan qorǵaý jolynda týabitti jaýyngerge aınaldy. Ol – «Shyǵys» óńirlik qolbasshylyǵyna qarasty 5512 áskerı bóliminiń merzimdi áskerı qyzmetshisi, qatardaǵy Orazbek Ermekbaı.
«Adamǵa ósken ortasy yqpal etpeı qoımaıtyn tárizdi. Mysaly, men Túrkistan oblysynan áskerge shaqyryldym. Jalyndy stýdenttik jyldardan keıin zyryldaǵan ómir kúrt ózgeriske ushyraıtyndaı bolyp kórinetin de turatyn. Eńseli bilim ordasyn ózińmen birge támamdaǵan úzeńgiles qatarlastaryń jalaqysy joǵary jumysqa kirip, azdaǵan ýaqyttan keıin baz bireýi qymbat kólik tizgindep, keıbireýi bolsa úıli bolyp shyǵa keledi. Al seniń áli de shaı-pulyńnan aspaıtyn jalaqyǵa qarap kúneltkeniń shynymen janyńa batady. Mardymsyz nápaqany talǵajaý etkenińe býradaı býyrqanyp alasurǵanyńmen, ishteı tynasyń. Men sııaqty qomaqty aqsha tóleıtin laıyqty jumys tapsam degen aýdandaǵy joldas jigit te talaı keńselerdiń tabaldyryǵyn tozdyryp, keneýi ketti. Ekeýmizdi boks úıirmesi tanystyrǵan. Talaı jyl ataqty boksshy bolamyn dep bylǵary qolǵap kıgenim bar», dep bastady sózin keıipkerimiz.
О́mirdiń kúıbeń tirligi men aýyrtpalyq adam balasyn ártúrli jolǵa salady. О́kinishke qaraı, az ǵana ýaqyttyń ishinde astyna sý jańa kólik minip, shyqyrlatyp aqsha sanap júrgen dosynyń is-áreketi kúdik týdyra bastaǵan. Arada biraz jyl ótkende jol ústinde kele jatqan ol «Anany ustańdar» dep kósheni basyna kótergen daýystan jalt qaraǵan. Kóz júgirtim jerde medısınalyq betperdemen tumshalanǵan bireý týra aldynan orǵı júgirip bara jatyr. Artynan tura umtylǵandarǵa jetkizer emes. Dene bolmysy óziniń burynǵy dosyna kelińkireıdi eken.
«Kúdiktiden kózjazym jerden aıyrylyp, ashýǵa býlyqqan qýǵynshylardan jetkizbeı ketken jelaıaqtyń kim ekenin suradym. Úı aýlasyna esirtki jasyryp júrgen ózimniń tanysym ekenin bilgende, tóbe shashym tik turdy. Bir mezette mundaı qadamǵa barǵan adamdy sońyna deıin ózimniń tanysym emes ekenine sendirip te kórdim», deıdi Orazbek Ermekbaı.
Sol kúni jol boıy zamandastarynyń jaman ádetke qumar bolyp, jeńil jolmen aqsha tabýǵa umtylýy ultqa japa shektirip jatqanyn oı eleginen ótkizgen ol osy oqıǵadan keıin qoǵam dertine qarsy kúresýdi maqsat etken eken.
«О́kinishtisi sol, qazir sıntetıkalyq zattardy tasýǵa áýes jastar kóp. «Kýrer qajet» dep shaqyryp alyp, qylmysqa ıtermeleıtinderdiń quryǵyna ilingen tanysymnyń taǵdyrlastaryna tosqaýyl bolý kerek dep oıladym. Qazir Ulttyq ulan qatarynda, esirtki tasymaldaýshylardy quryqtap júrmin. Osylaısha, esirtkiniń taralý joldaryna balta shabýǵa tyrysyp kelemin. Ulttyq ulan sapynda qyzmet etýimniń de sebebi osynda jatyr. «Áskerı bólim – ómirlik maqsattarymnyń júzege asýyna serpin bergen meken» dep jıi aıtatynym da sondyqtan», dep aǵynan jaryldy ol.
Alaıda sarbaz ataný úshin alǵa qoıǵan maqsat azdyq etedi. Bul úshin taýdaı talap, qajyrly eńbek pen joǵary jaýapkershilik qajet. «Qylmysqa tosqaýyl bolý úshin jaıaý jasaq quramyndaǵy merzimdi áskerı qyzmetshilerdiń jekpe-jek urys tásilderdi jetik meńgerý deńgeıleri árqashan syn-synaqtan ótip, únemi baqylaýda bolady. О́ıtkeni jaýyngerlik qyzmet kezinde buzaqy qol kóterip, sýyq qarý paıdalanǵan sátte toıtarys berýi kerek. Sharshy alańda ter tógip, baıraqty básekede top jarmasam da, judyryqtasý ónerine ábden daǵdylanǵanym qyzmet barysynda kóp kómegin tıgizedi. Qazir bul jerde de fızıkalyq daıyndyǵymdy kún saıyn shyńdaımyn. О́ıtkeni qylmyskerdi quryqtaýda shıraq qımyl asa qajet», deıdi Orazbek.
Sarbaz úshin turǵyndardyń tynyshtyǵy, beıbit ómirden asqan marapat joq. Sondyqtan Orazbek Ermekbaı kúndelikti áskerı mindetin abyroımen atqarýdy basty paryzy dep biledi. Máselen, sáýir aıynan bastap áskerı bóliminiń jaýyngerlerimen, polısııa qyzmetkerlerimen, birlese otyryp, ishki ister organdaryna túrli quqyq buzǵany úshin júzden asa adamdy jetkizgen. Qatardaǵy jaýynger Orazbektiń de bul baǵytta atqarǵan jumysy jeterlik.