Elordalyq polıseıler osyndaı devızben velosherý ótkizdi. Nashaqorlyqqa qarsy kúres kúni qarsańynda, sondaı-aq «Nashaqorlyqqa qarsy kúres jáne nashaqorlyqtyń aldyn alýdyń 2023–2025 jyldarǵa arnalǵan keshendi josparyn» iske asyrý aıasynda uıymdastyrylǵan sharaǵa astanalyqtar da úles qosty.
Velosherýge polısııa departamentiniń qyzmetkerleri, qalalyq ákimdiktiń, sport seksııalarynyń, ÚEU jastar qozǵalystarynyń ókilderi, sonymen qatar óz betimen nıet bildirgender – barlyǵy 700-den astam adam qatysty.
Velosherý Turan dańǵylynyń boıyndaǵy «Qazaqstan kúni» monýmentinen bastaý alyp, Qorǵaljyn tas jolynda jalǵasyp, Turan dańǵyly boıyndaǵy demalys saıabaǵynda aıaqtaldy. Jarys barysynda veloshabandozdarǵa polısııanyń patrýldik kólikteri men eskord vzvody ilesip júrdi. Astana qalalyq polısııa departamentiniń bastyǵy, polısııa general-maıory Marat Tólebaevtyń jetekshiligimen qatysýshylar on shaqyrymdy baǵyndyrdy.
Sporttyq shara – óskeleń urpaq arasynda esirtki qylmysymen kúresý, sondaı-aq jastardyń esirtkige áýes bolmaı, psıhoaktıvti zattardy qoldanbaı, bos ýaqytyn durys paıdalanýyn, buqaralyq sportty keńinen nasıhattaý men damytý maqsatynda ótkizildi.
«Velosherý eń aldymen nashaqorlyq máselesine qoǵamnyń nazaryn aýdarýǵa baǵyttalǵan. Bul – búkil qoǵam úshin problema jáne onymen bárimiz birge, jumyla kúresýimiz qajet», dedi Polısııa departamentiniń basshysy.
Jyl basynan beri polısııa qyzmetkerleri zańsyz esirtki aınalymynan jalpy salmaǵy 60 kg-dan astam esirtki zatyn tárkiledi. Mundaı is-sharalar óskeleń urpaqtyń boıynda nashaqorlyqqa tózbeýshilikti qalyptastyrý, sondaı-aq olardy osy zııandy táýeldilikten qorǵaýǵa baǵyttalǵan.
Velosherýdiń barlyq qatysýshysy belgilengen qashyqtyqtan súrinbeı ótti, al olardyń dostary men áriptesteri máre syzyǵynda kútip turdy.