Almaty oblysynyń prokýratýrasy aýyl sharýashylyǵy basqarmasyn tekserý nátıjesinde bıýdjettik sýbsıdııalardy zańsyz tóleý jáne urlaý faktilerin anyqtady, dep jazady Egemen.kz.
Sýbsıdııa tóleý aıasynda zańsyz úlestirilgen qarjy somasy 4,8 mlrd teńgeden asqan.
Prokýratýranyń qadaǵalaý aktisi boıynsha shyǵyndy óteý prosesi bastalyp, bıýdjetke 110 mln teńge qaıtaryldy.
«Aýyldardaǵy áleýmettik-óndiristik kooperatıvter asyl tuqymdy janýarlardy alý maqsatynda seleksııalyq jumystarǵa arnalǵan 1,2 mlrd teńge sýbsıdııany urlaǵan. Is júzinde bul jumystar oryndalmaı, qujattar resmı túrde resimdelip, oblysta asyl tuqymdy mal sany ulǵaıtylmaǵan. Oblys ákimdiginiń eseptik derekteri boıynsha, asyl tuqymdy mal sharýashylyǵyn damytý boıynsha belsendi jumys júrgizilip jatyr. Qaǵaz júzinde asyl tuqymdy qoı basy 4 jylda 1,9 mln-ǵa deıin ulǵaıtylǵany týraly derek jalǵan bolyp shyǵyp, shyn máninde nebári 367 myń bas ekeni belgili boldy», delingen Almaty oblysynyń prokýratýrasy taratqan habarlamada.
Máselen, Almaty oblysy Uıǵyr aýdanynda tirkelgen janýarlar joq bolsa da, 2023 jyly seleksııalyq jumystardy júrgizgeni úshin 45,2 mln teńge somasyna sýbsıdııa alǵan.
Sýbsıdııa alǵan kezde bul kooperatıv óziniń jeke sharýashylyǵy retinde Uıǵyr aýdanynyń turǵyndaryna tıesili aýylsharýashylyq janýarlaryn tirkegen.
«Ákimdik mal basynyń naqty saqtalýyna monıtorıng júrgizbegen, saldarynan memlekettik bıýdjetke zalal keltirilgen. Qazirgi ýaqytta sotqa deıingi tergeý amaldary júrgizilip jatyr, zańsyz tólengen sýbsıdııalardy qaıtarýǵa 3 usynys engizildi», dep qosty oblystyq prokýratýra ókilderi.