Astanadaǵy Túrkııa Respýblıkasy elshiliginiń Kommýnıkasııa jónindegi basqarmasy 2016 jylǵy 15 shildedegi tóńkeris qurbandaryn eske alý rásimin ótkizdi.
Is-sharaǵa elimizdiń Ulttyq ulannyń general-maıory Qaırat Úmbetov, podpolkovnık Talǵat Náshenov, sondaı-aq Qazaqstan musylmandary dinı basqarmasynyń ókilderi, elshiliktiń qyzmetkerleri qatysty. Shara 2016 jyly 15 shildede tóńkerisshilerdiń qolynan qaza bolǵan 253 sheıitti bir mınýt únsizdikpen eske alýmen bastaldy.
Rásimge qatysqan Qazaqstan musylmandary dinı basqarmasynyń mamany Abylaıhan Erejepov quran oqyp, týys halyqtyń basynan ótken qaraly kúnderdiń qaıtalanbaýyn tiledi. Sondaı-aq eki eldiń bolashaǵy jarqyn, yntymaqtastyǵy órbı bererine senim bildirdi. О́z kezeginde sóz alǵan naıb múftı Ershat Aǵybaı da sheıitterge duǵa jasap, álemdegi geosaıası jaǵdaı qubylyp turǵan kezeńde memleketterdiń amandyǵy men tynyshtyǵy mańyzdy ekenin eske saldy. Budan keıin jınalǵandardyń nazaryna toǵyz jyl buryn Túrkııada bolǵan oqıǵa týraly derekti fılm usynyldy.
Saltanatty sharada sóz alǵan Túrkııanyń Astanadaǵy Elshisi Mustafa Kapýdjý terrorıstik uıym kez kelgen elge qaýip tóndiretinin atap ótti. Bul oraıda ol baýyrlas Qazaqstannyń da terrorlyq uıymǵa qarsy jergilikti jáne halyqaralyq zań aıasynda tıimdi kúres júrgizýde qoldaý kútetinin jetkizdi.