Kerekýden kórnekti aqyn, aýdarmashy Ǵalı Ormanulynyń 1948 jyly A.Baıtursynuly qarpinde jaryq kórgen «О́mir dastany» atty kitaby tabyldy. Jádigerdi jergilikti mýzeıge qalamgerdiń jıeni tartý etti.
Kórnekti qalamgerden mura bolyp qalǵan bul jádigerdiń ereksheligi, kitaptyń túpnusqasy elimizdiń ózge kitaphanalary men mýzeılerinde saqtalmaǵan. Kitap A.Baıtursynuly qarpinde 1948 jyly jaryq kórgen. Basylyp shyqqan orny – Qazaqtyń memlekettik baspahanasy, «Qazaq eli» jýrnalynyń baspasy dep kórsetilgen. Jınaqta aqynnyń óleńderi toptastyrylǵan. Atap aıtqanda, «Ana sabaǵy» dastany, «Alǵashqy adym», «Jolda», «Qýanysh», «Bizdiń aýyl», «Temir at», «Sheńber», «Ana tolǵaýy», «Qyrmanda», «Ustaz», «Bizdiń zaman» jáne taǵy basqa óleńderi basylǵan. Kitap shamamen 200 betten turady, paraqtary jaqsy saqtalǵan.
Jádigerdi aqynnyń jıen-nemeresi Aıdar Qyryqbaıuly mýzeıge amanattady.
Mýzeı basshysy Erbol Qaıyrov buǵan qosa 1939-1945 jyldar aralyǵynda Jambyl Jabaevqa ádebı hatshylyq qyzmet atqarǵan Ǵalı Ormanovtyń kúndeligi de qosa berilip otyrǵanyn habarlady. Mekeme ujymy ony jyr alybynyń 180 jyldyǵynda kórsetemiz dep otyr.
Ǵalı Ormanov (1907-1978) — búkil sanaly ǵumyrynda ulttyq ádebıetimizdiń ósip-órkendeýine, qazaq poezııasynyń damýyna erekshe úles qosqan aqyn. Orystyń, Shyǵystyń klassıkalyq úlgilerin aýdaryp, qazaq ádebıeti salasyna ólsheýsiz úles qosqan aýdarmashy. Onyń qalamynan qazaq ádebıetiniń altyn qazynasyna óleńder jınaqtary, poemalary, jyr kitaptary, prozalyq shyǵarmalary jaryq kórgen.
Pavlodar oblysy