Irlandııanyń Dýblın qalasynda ótken IGeO-2024 geografııa boıynsha halyqaralyq olımpıadada Qazaqstan oqýshylary júldeli oryndardy ıelendi. Aıtýly dodaǵa álemniń 50 elinen 200-ge jýyq oqýshy qatysqan, dep habarlaıdy Egemen.kz.
Oqý-aǵartý mınıstrligi bizdiń oqýshylar bir kúmis, úsh qola medal jeńip alǵanyn habarlady. Atap aıtqanda, Taldykorǵan qalasyndaǵy FMB NZM 11-synyp oqýshysy Aqjol Bolat kúmis medal ıelendi. Jambyl oblysyndaǵy daryndy balalarǵa arnalǵan mamandandyrylǵan «Daryn» lıseı-ınternatynyń 11-synyp oqýshysy Jomart Sabyr, Shymkent qalasyndaǵy HBB NZM 11-synyp oqýshysy Arsen Sydyqov, Shymkent qalasyndaǵy HBB NZM 11-synyp oqýshysy Qanat Serikbaı qola medal jeńip aldy.
Qazaqstan komandasyna «Daryn» RǴPO dırektorynyń orynbasary Nurlan Jumageldi men «Daryn» RǴPO bólim basshysy Maqsat Aýbakırov jetekshilik etken. Aıta keteıik, IGeO olımpıadasy 1996 jyldan beri Halyqaralyq geografııalyq odaqtyń (IGU) qoldaýymen ótkizilip keledi.