Kezekten tys Qazaqstan Respýblıkasynyń Prezıdentin saılaý barysyn bir aı boıy tolyqtaı qadaǵalaǵan TMD baıqaýshylar mıssııasy Ortalyq saılaý komıssııasynda baspasóz máslıhatyn ótkizdi. Jıynǵa TMD elderinen kelgen birqatar baıqaýshylar qatysty.
Saılaý kezeńin baqylaý boıynsha mıssııa ókilderi óz jumystaryn aǵymdaǵy jyldyń naýryz aıynyń otyzynan bastaǵan bolatyn. Bir aı kóleminde saılaýaldy jáne saılaýdan keıingi jaǵdaılardy muqııat barlaı otyryp, biz birqatar málimetterdi habarlaımyz, dedi TMD baıqaýshylar mıssııasynyń basshysy Sergeı Lebedev. Jáne de ol TMD mıssııasy quramynda segiz memleketten barlyǵy 410 baıqaýshy bar ekendigin atap ótti.
Atalǵan merzim ishinde egjeı-tegjeıli baqylaý jasaǵan mıssııa ókilderi Qazaqstandaǵy saılaýdy uıymdastyrý júıesine oń baǵa berip otyrǵandyǵyn jetkizdi. Jáne de saılaýshylardyń joǵary deńgeıde belsendilik tanytqandyǵyn erekshe yqylaspen atap ótti. S.Lebedev bul oraıda «halyqtyń aǵylyp, kezekke turyp daýys berýi olardyń maqsat-múddeleri ortaq ekendikteriniń, bolashaqtaryna jaýapkershilikpen qaraǵan qadamynyń kórinisi» dedi.
Sonymen qatar, mıssııa basshysy Qazaqstan memleketiniń zańnamalyq jaǵdaılary da jetilip kele jatqandyǵyn, halyqaralyq saılaý quqyǵynyń normalaryna saı, tipti kóptegen elderge úlgi bolarlyq dárejede ekendigin atap kórsetti. Jáne saılaý tolyqtaı «Saılaý týraly» Qazaqstan Respýblıkasynyń Konstıtýsııalyq zańyna sáıkes ótti. Daýys berý erkin, ashyq jáne demokratııalyq tańdaý qaǵıdattaryna negizdeldi, dedi.
Sondaı-aq, mıssııa ókilderi saılaýaldy jáne saılaý kezindegi oblystardyń daıyndyǵyna baılanysty monıtorıng júrgizgenderin aıtty. 3534 saılaý ýchaskelerin aralap, olardyń árqaısysyna jeke-dara úzdik baǵa berýge bolatyndyǵyn jetkizdi.
Elmıra MÁTIBAEVA,
«Egemen Qazaqstan».