Astanada kúıshi Dına eskertkishindegi QR-kod taqtasyn belgisiz bireýler qıratyp ketken. Astana qalasy qoǵamdyq keńesiniń múshesi Tólegen Qýanyshev ákimdikten eskertkishtiń mańaıyna beınekamera ornatýdy surady, dep habarlaıdy Egemen.kz.
«Kúıshi Dına eskertkishinde QR-kod taqtasy ornatylǵan edi. Sonyń aıaqpen teýip qıratyp ketken. Kameranyń ózin bolmasa da, mýlıajyn qoısa bolar edi. Adamdar kamera bar ekenin kórse, baqylaý bar ekenin bilip, aıaǵyn tartýshy ma edi?», dedi ol qoǵamdyq keńestiń otyrysynda.
Astana qalasy ákiminiń orynbasary Evgenıı Glotov qalanyń kameramen jabdyqtaý máselesi josparda bar ekenin aıtty.
«Byltyr 1200 kamera ornattyq. Taǵy da konkýrs prosedýralary júrip jatyr. Bıyl taǵy myńnan astam kamera qoıamyz. Sıfrlandyrý basqarmasyna osy jerde tapsyrma beremin. Áriptesterimiz aıtyp otyrǵan aýdanda mindetti túrde turaqty beınebaqylaý uıymdastyrylsyn. Ol kameralar polısııa departamentiniń jedel basqarý ortalyǵyna jalǵanýy kerek. Jekelegen parasatsyz azamattardyń tarapynan zaqym keletin nysandarǵa 24 saǵattyq beınebaqylaý ornatylsyn. Bul máseleni jyl aıaǵyna deıin tyndyrý kerek», dedi qala ákiminiń orynbasary.