Sońǵy jyldary jasalǵan «AD Scientific Index» halyqaralyq reıtıngisinde ál-Farabı atyndaǵy Qazaq Ulttyq ýnıversıtetiniń hımııa jáne hımııalyq tehnologııa fakýltetiniń organıkalyq zattar, tabıǵı qosylystar jáne polımerler hımııasy kafedrasynyń oqytýshylary Qazaqstannyń eń úzdik 2 myń ǵalymynyń tizimine enip, birneshe jyldan beri aldyńǵy qatardy bermeı keledi.
Al Alper-Doger Scientific Index – jeke ǵalymdardyń sońǵy 6 jyldaǵy ǵylymı ónimdiligine negizdelgen reıtıng ári Google Scholar taldaý júıesimen ındeksteledi.
Polımerler hımııasy salasynda aıtarlyqtaı tabysqa jetken ǵalymdardyń biri – Perızat Úrkimbaevanyń gıdrofıldi, bıoydyraıtyn polımerler men olardyń qoldanylýy jónindegi 20 shaqty maqalasy ımpakt faktory joǵary jýrnaldarda jaryq kórgen. Al Raıhan Rahmetýllaevanyń stımýlsezimtal polımerlerdiń sıntezi, bıomedısınalyq polımerler men olardyń qoldanylýy týraly 14 eńbegi Scopus, Clarivate Analytics derekqoryna kiretin jýrnaldarda jarııalanǵan.
– Árıne, bul jetistikter memleket tarapynan ǵylymnyń zamanaýı baǵyttaryn damytýdy qoldaýdyń arqasynda iske asyp jatyr. Ýnıversıtet basshylyǵy da ǵylym kóshin alǵa súıreıtin jobalarǵa únemi qoldaý kórsetip otyrady. Sońǵy jyldary ǵylymı jumystardy qorytyndylaý barysynda Web of Science jáne Scopus derekter bazasynda ındekstelgen halyqaralyq basylymdardaǵy jarııalanymdar sany artyp keledi. Bir jaǵynan bul ǵylymı zertteýlerdiń sapasyn arttyrý, álemniń jetekshi ýnıversıtetteri men ǵylymı-zertteý ınstıtýttarymen yntymaqtastyqtyń arqasynda atqarylyp jatyr, – deıdi hımııa ǵylymdarynyń kandıdaty Perızat Ibragımqyzy.
Perızat Úrkimbaeva kafedrada atqarylyp jatqan ǵylymı jobalardyń kópshiligi qorshaǵan ortany qorǵaý men ekologııa máselesine baǵyshtalyp jatqanyn aıtady.
Ǵalym Raıhan Rahmetýllaeva: «Qazaqstan naryǵynda polımer negizindegi paketterdiń tek bir túri bar, ol polıetılennen jasalǵan paketter. Qazir onyń qorshaǵan ortaǵa zııany, qoqystarda jatyp, jyldar boıy ydyramaıtyndyǵy belgili. 2025 jyldan bastap bıoydyramaıtyn paketterdi qoldanýǵa zańmen shekteý qoıylady. Osyǵan oraı QazUÝ-dyń ǵalymdary: professor G.Mýn men dosent P.Úrkimbaevanyń basshylyǵymen kóp jyldan beri osy máseleni sheshý úshin ǵylymı jumystar júrgizilip keledi. Birneshe ınnovasııalyq patentter alynyp, ǵylymı maqalalar joǵary reıtıngilik basylymdarda jaryq kórgen», deıdi.
Perızat Úrkimbaeva kafedra 2021 jyly Ǵylym jáne kommersııalandyrý jónindegi halyqaralyq keńestiń jarııalaǵan konkýrsyna «Túrlendirilgen krahmal negizindegi bıologııalyq ydyraıtyn materıaldar óndirisi» atty jobany usynyp, jeńip alǵanyn atap ótse, osy ǵylymı jobanyń jetekshisi Raıhan Rahmetýllaeva:
«Joba Halyqaralyq Qaıta Qurý jáne Damý Bankiniń maquldaǵan «О́nimdi ınnovasııalardy yntalandyrý» baǵdarlamasy sheńberinde júrdi. Jobany iske asyrý úshin 96 038 805 teńge bólindi. Jobanyń negizgi maqsaty – arzan, qol jetimdi, bıoydyraıtyn, kúndelikti ómirde qoldanylatyn paketter shyǵarý. Mundaı paketterdi jasaý úshin krahmaldy qoldanamyz. Qazirgi tańda Aqmola oblysy Arshaly aýdanyndaǵy «Er-Batyr Bıopolımer» JShS-de jumys júrip jatyr. О́ndiriletin paketterdiń bıoydyraıtyn qasıetteri QazUÝ-dyń hımııa fakýltetinde zerttelý ústinde. Iri sýpermarkettermen kelissózder júrgizildi», deıdi.