AQTО́BE. 28 qańtar. Aqtóbe oblysynyń ákimi Arhımed Muhambetovtiń tóraǵalyq etýimen ótken kadr komıssııasynyń otyrysynda «A» korpýsynyń memlekettik ákimshilik qyzmetiniń kadr rezervine úmitkerlermen áńgimelesý bolyp ótti. Bul týraly egemen.kz tilshisi habarlady.
Prezıdent janyndaǵy kadr saıasaty jónindegi ulttyq komıssııa ótken jyldyń jeltoqsan aıynda «A» korpýsy kadr rezervine irikteý jarııalaǵan bolatyn. Soǵan sáıkes Aqtóbe oblysynan 20 úmitker qujattaryn tapsyrǵan-dy. Bıylǵy qańtar aıynyń orta tusynda Astanada ótkizilgen testileýdiń nátıjesinde on úmitker synaqtyń shekti máninen joǵary nátıje kórsetti. Oblystyq kadr komıssııasynyń otyrysynda on úmitkerge úsh blok boıynsha aldyn ala daıyndalǵan suraqtar usynylyp, áńgimelesý ótkizildi. Komıssııa músheleri úmitker, onyń qazirgi qyzmetindegi laýazymdyq mindetteriniń sıpaty, negizgi jetistikteri jóninde aqparat alyp qana qoımaı, qoǵamdyq qyzmetke qatysýyn, sondaı-aq memlekettik qoǵamdyq-saıası qurylymdy bilý, damý strategııasyn baıyptaý deńgeıin anyqtady. Sonymen birge, úmitkerlerdiń «A» korpýsynyń kadr rezervine kirý sebepteri men uǵynýy, memlekettik qyzmettiń qoǵam, memleket úshin mańyzdylyǵyn túsinýi, memlekettik qyzmetkerge qoıylatyn talaptar, talaptanýshynyń etıka men qundylyqtar baǵdary, olardyń uıymdastyrýshylyq, kóshbasshylyq qabilet-qarymdary, minez-qulqy sarapqa salyndy.
Komıssııa otyrysyna Prezıdent Ákimshiliginiń memlekettik ınspektory Shalqar Baıbekov qatysty.
Kadr komıssııasynyń jumysyn qorytyndylaı kele Arhımed Muhambetov úmitkerlerge alǵa qoıǵan maqsattaryna jetýge tilek bildirdi.
Satybaldy Sáýirbaı.
Derek: egemen.kz.
Sýret: aktobe.gov.kz.