Ǵylymdy damytý jaıyna arnalǵan keńes

Qazaqstan Respýblı­ka­­synyń Memlekettik hat­shysy Gúlshara Áb­di­qaly­qova ǵylymdy damytý máse­lelerine arnalǵan keńes ótkizdi, dep habarlady Pre­zıdenttiń baspasóz qyzmeti. Keńeste Qazaqstanda jumys isteý úshin shetelderden qazaqstandyq tanymal ǵalymdardy tartý jáne olardyń jumys tıimdiligin arttyrý, respýblıkadan tysqary ketý yqtımaldyǵyn azaıtý maqsatynda otandyq ǵalymdarǵa jaǵdaılar jasaý máseleleri qaraldy. Keńeske Prezıdent Ákim­shiligi Basshysynyń orynbasary B.Maılybaev, Bilim jáne ǵylym mınıstri A.Sá­rinjipov, Prezıdent Ákim­shi­liginiń qurylymdyq bólim­deriniń basshylary, Bilim jáne ǵylym, Investısııalar jáne damý, Densaýlyq saq­taý jáne áleýmettik damý mınıstr­lik­teriniń, Ortalyq kommýnıkasııalar qyzmetiniń, Nazarbaev Ýnıversıtet pen L.N.Gýmılev atyndaǵy Eýrazııa ulttyq ýnı­versıtetiniń ókilderi qatysty. G.Ábdiqalyqova Memleket basshysynyń «Nurly Jol – bolashaqqa bastar jol» atty Joldaýy aıasyndaǵy negizgi baǵyttar boıynsha qazaqstandyq ǵylymı kadrlar áleýetin saqtaý jáne arttyrýdyń, ǵylymı zertteýler men ázirlemelerdi yntalandyrýdyń mańyzdylyǵyna toqtaldy. Atap aıtqanda, Qazaqstan Respýblıkasy Prezıdenti janyndaǵy eki komıssııanyń – Shetelderde kadr­lar daıarlaý jónindegi respýblıkalyq komıssııa men Ǵylym jáne tehnıka salasyndaǵy ál-Farabı atyndaǵy Memlekettik syılyqtardy berý jónindegi komıssııanyń qyzmeti osy jáne basqa da mindetterdi sheshýge baǵyttalǵan. Qazirgi ýaqytta Qazaqstanda ǵylymı zertteýlermen 23,7 myń adam aınalysady. Ǵylymı ortadaǵy ǵylym doktorlarynyń sany 1688, (9,8%), ǵylym kandıdattary – 4915 (28,6%), PhD doktorlary – 218 (1,2%), kásiptik baǵyttar boıynsha doktorlar – 605 (3,5%), ǵylymı ataǵy joq izdenýshiler – 9774 (56,8%) adam. Bul rette 35 jasqa deıingi ǵalymdardyń úlesi 38% bolsa, 45 jasqa deıingilerdiń úlesi 56%. 2014 jyly Qazaqstanda jumys júrgizý úshin ártúrli ǵylymı baǵyttar boıynsha 600-den astam sheteldik ǵalym tartyldy, sonyń 75-i qazaqstandyq. «Nazarbaev Ýnıversıtet» AAQ-qa AQSh-tan, Ulybrıtanııadan, Kanadadan, Fransııadan, Italııadan, Nıderlandtan 350-den astam (onyń 26-sy qazaqstandyq) sheteldik ǵalymdar shaqyryldy. Búginde shetelderdegi belgili ǵylymı ortalyqtarda, atap aıtqanda, nanotehnologııa, robotty tehnıka, munaı-gaz ken oryndaryn zertteý, gıdrodınamıka, gendik ınjenerııa, obyr aýrýyn týǵyzatyn kletkalar bıologııasy, DNK reparasııasy men mýtagenez salalary sııaqty keleshegi zor ǵylymı baǵyttarda 53 qazaqstandyq ǵalym tabysty jumys isteýde. Keńes qorytyndysy boıynsha Memlekettik hatshy memlekettik organdarǵa Shetelderde kadr­lar daıarlaý jónindegi respýblıkalyq komıssııa men Ǵylym jáne tehnıka salasyndaǵy ál-Farabı atyndaǵy Memlekettik syılyqtardy berý jónindegi komıssııanyń jumystaryna qatysty birqatar naqty tapsyrmalar berdi.