2024 jylǵy 25-30 qazan aralyǵynda AQSh-tyń San-Fransısko qalasynda Ortalyq Eýrazııa men Kremnıı alqabynyń tehnologııalyq ındýstrııasyn biriktiretin alǵashqy tehnologııalyq konferensııa ótip jatyr, dep habarlaıdy Egemen.kz.
Bul is-sharaǵa Ortalyq Eýrazııadan jáne álemniń ózge aımaqtarynan IT-ındýstrııa kóshbasshylary, jetekshi tehnologııalyq kompanııalar, ýnıversıtetter, venchýrlyq qorlar, ınvestorlar jáne startapshylar qatysyp jatyr. Qazaqstan atynan osy is-sharaǵa Parlament Májilisiniń depýtaty Erbolat Saýryqov bardy.
Konferensııa TechCrunch Disrupt forýmy aıasynda uıymdastyryldy. Bul forým – startaptardyń negizin qalaýshylar, ınvestorlar, kıberqaýipsizdik mamandary, Web3 tehnologııasynyń jáne jasandy ıntellekttiń sarapshylary jınalatyn álemdegi eń mańyzdy is-sharanyń biri.
Forýmda Erbolat Saýryqov Qazaqstannyń sıfrlyq ekonomıkany damytýdaǵy jetistikterin aıtyp, mundaı jıyndardyń elge qajettiligin jáne olardyń paıdasyn erekshe atap ótti. Depýtattyń aıtýynsha, bizdiń elimizde de osyndaı forýmdardy jıi ótkizý qajet.
Depýtat atap ótkendeı, bul platforma jahandyq ınvestorlar qaýymdastyǵy men ozyq tehnologııalyq sheshimderdi tanystyrýǵa jáne qarjylyq qoldaý kórsetýge arnalǵan mańyzdy alań bolyp sanalady.
«Bıylǵy Joldaýynda Memleket basshysy Qazaqstan jasandy ıntellektini keńinen qoldanatyn jáne sıfrlyq tehnologııalardy damytyp jatqan elge aınalýǵa tıis degen edi. Osy oraıda Krot Innovation habynyń TechCrunch-pen seriktestigi Qazaqstannyń IT-sektoryn damytý úshin jańa perspektıvalar ashady. Bul is-sharaǵa qatysý qazaqstandyq startaptarǵa aýyldyq aımaqtardy sıfrlandyrý, derekterdi qorǵaý sekildi jergilikti qajettilikterge baǵyttalǵan tehnologııalarmen tanysýǵa, ózara tájirıbe almasýǵa jáne halyqaralyq kompanııalarmen baılanys ornatýǵa múmkindik beredi. Mundaı seriktestik qazaqstandyq IT-kompanııalardyń álemdik deńgeıde damýyna jáne elge jańa tehnologııalardy engizý úderisin jedeldetýge septigin tıgizedi», dedi Erbolat Saýryqov.
Qazir Májilis depýtattary jańa sıfrlyq kodeks boıynsha jumysty bastap ketti. Erbolat Saýryqovtyń aıtýynsha, álemdik tájirıbeni zerdeleýde osyndaı jahandyq alańdar mol múmkindik beredi.
Konferensııaǵa Google, Coinbase, Honeycomb, NASA sııaqty álemge áıgili kóshbasshy kompanııalardyń sarapshylary atsalysyp, pikir bólisti.
Sonymen qatar Májilis depýtaty TechCrunch Disrupt ınnovasııalyq forýmyna da qatysty. Startap kóshbasshylar, ınvestorlar, kıberqaýipsizdik sarapshylary, Web3 tehnologııasyn jáne jasandy ıntellekt jasaýshylar bas qosqan jıynda jańa stratap jobalardyń tastyrylymy ótti.