AQTAÝ. 29 qańtar. Memlekettik ister jónindegi agenttigi Mańǵystaý oblysy boıynsha departamentiniń burynǵy qyzmetkerlerine qatysty sot úkimi jarııalandy. Bul týraly egemen.kz tilshisi habarlady.
Aqtaý qalalyq sotynda Qylmystyq kodekstiń 311-babynyń 4- bóligi, «g» tarmaǵymen (birneshe ret para alý) E.Ospanovqa, Qylmystyq kodekstiń 313-babynyń 1-bóligimen (paraqorlyqqa deldal bolý) N.Ihsanova men J.Kýrazovaǵa qatysty qylmystyq is boıynsha úkim jarııalandy.
Atalmysh departamenttiń basshysy bolǵan E.Ospanov memlekettik qyzmetke úmitkerlerden testileýden jaǵymdy nátıjege jetý úshin birneshe ret aqshalaı syılyqtar alǵany úshin, al departament basshysynyń orynbasary N.Ihsanova men personaldy basqarý bóliminiń basshysy J.Kýrazova para alýǵa jáne berýge deldal bolǵany úshin aıyptalǵan edi.
Aqtaý qalalyq sotynyń úkimimen E.Ospanov Qylmystyq kodekstiń 366-babynyń 3-bóliminiń 4-tarmaǵymen kináli dep tanylyp, ony 7 jylǵa bas bostandyǵynan aıyrý jazasy taǵaıyndalyp, jazany túzeý kolonııasynyń jalpy rejiminde óteý belgilendi. Sondaı-aq, onyń jeke múlki tárkilenip, Qylmystyq kodekstiń 41-babynyń 2-bólimine saı memlekettik organdarda qyzmet atqarý quqynan 7 jylǵa aıyryldy.
Bir epızod boıynsha E.Ospanov kinásiz dep tanylǵan.
Al N.Ihsanova jáne J.Kýrazova Qylmystyq kodekstiń 313-babynyń 1-bólimimen kináli dep tanylyp, olardyń árqaısysyna jaza retinde 700 aılyq eseptik kórsetkish mólsherinde 1 387 400 teńgeden aıyppul salynyp, memlekettik organdarda qyzmet atqarý quqynan 1 jylǵa aıyryldy.
Mańǵystaý oblystyq soty baspasóz qyzmetiniń habarlaýynsha, úkim zańdy kúshine engen joq.
Gúlaıym Shyntemirqyzy.
Derek, sýret: egemen.kz.