ASTANA. 29 qańtar. Qańtardyń 28-i kúni Ońtústik Qazaqstan oblysy Shardara aýdanyndaǵy mektepterdiń birinde qaıǵyly oqıǵa oryn aldy. Bul týraly Times.kz agenttigi habarlady.
Mektep oqýshysynyń ólimi týra oqý orny ǵımaratynyń ishinde oryn alǵan. Saǵat 11 shamasynda úshinshi qabatta 10-synyp oqýshysy 9-synypta oqıtyn balamen ustasyp qalady. Bulardyń sońǵysy mektepke ózimen birge pyshaq ala kelgen eken. Ol tóbeles kezinde sony qaltasynan shyǵaryp, qarsylasyna birneshe soqqy beredi.
«Onynshy synyp oqýshysy alǵan jaraqatynan qaıtys boldy, toǵyzynshy synyp oqýshysyn polısııa alyp ketti», - dep jazady basylym.
Qazir bolǵan oqıǵanyń barlyq sebep-saldarlary tekserilip jatyr.
Ońtústik Qazaqstan oblysynda mektep oqýshysyn óltirýdiń qaıǵyly jaǵdaıy 2014 jylǵy qarasha aıynda oryn alǵan edi. Sol joly Saryaǵash aýdanyndaǵy Jibek joly aýylynda tóbeles kezinde ishine myltyqtyń oǵy tıgen jasóspirim jantásilim etken bolatyn. Keıinirek kináliler ustalyp, qamaýǵa alyndy.
Qurysh Nurymbet.
Derek, sýret: Times.kz.