QOSTANAI. 29 qańtar. Qostanaıdyń Reseımen shegaradaǵy Qarabalyq kentinde kempıng ashyldy. Bul týraly egemen.kz tilshisi habarlady.
Elbasy Nursultan Nazarbaev Qazaqstan halqyna joldaǵan «Nurly Jol – bolashaqqa bastar jol» joldaýynda «Qazirde qaınaǵan tirshilik kúre joldardyń boıynda. Jol — shyn máninde ómirdiń ózegi, baqýatty tirliktiń qaınar kózi. Barlyq aımaqtar temir jolmen, tas jolmen, áýe jolymen óz ara tyǵyz baılanysýy kerek» deı kelip, «kólik-logıstıkalyq ınfraqurylymdardy damytýdy» aldymen tapsyrǵan bolatyn. Reseıge shyǵatyn iri dańǵyl «Almaty-Ekaterınbýrg» tas jolynyń boıyndaǵy Qarabalyq kentinen shyǵa beriste, Qaıraq kedenine, ıaǵnı shekaraǵa jaqyn tustan kempıng ashyldy. Ony Qarabalyq aýdanyndaǵy kásipker Marat Aıtqazın jyl táýligine tolmas ýaqytta el ıgiligine tapsyrdy. Marat Nurǵalıuly bul jobaǵa qazirdiń ózinde 100 mıllıon teńge ınvestısııa saldy, ony taǵy keńeıtýdi josparlap otyr.
Kásipker Marat Aıtqazın: «Buryn Qazaqstan joldarynyń boıynda kempıng boldy ma, joq álde biz birinshi salyp otyrmyz ba, ol jaǵy maǵan beımálimdeý. Biletinim, «Almaty-Ekaterınbýrg» tas joly boıyndaǵy eń iri kempıng osy ekenine sendirgim keledi» dedi.
Kempıngtiń ishinde «bóri azyǵy jolda, er azyǵy jolda» deıtin jolaýshy úshin barlyǵy da qarastyrylǵan. Onda jolaýshylar men júrgizýshilerge arnalǵan otyz oryndyq óte qolaıly qonaq úı, ashana, bes jýynatyn bólme bar. Kempıngte jolaýshy tek jýynyp ǵana qoımaı, kirin jýyp, útiktep alýyna da jaǵdaı qarastyrylǵan. Tipti, temeki shegetin bólmege deıin bar. Kásipker kempıngte aldaǵy jazda úsh túrli monsha, jyly mashına qoıatyn, jóndeıtin oryndar bolatynyn da aıtyp otyr.
Kempıng jaqynda ǵana tapsyryldy, sonyń ózinde qazir kún saıyn onshaqty júk tasıtyn avtopoıyzdar toqtaıdy. Jol soǵyp kele jatqan jolaýshylar men júrgizýshiler ystyq tamaq iship, jýynyp-shaıynyp, uıyqtap, demalyp attanyp jatyr.
Kásipker Marat Aıtqazın: «Jıyrma jyl boıy bos turǵan sút zaýytynyń ǵımaraty tozyp bara jatqan soń, obalsynyp satyp alǵanmyn. Biraq alýyn aldym da, odan ne isterimdi bilmeı oılanyp júrip, qonaq úı jasaıyn dep shetinen jumysty bastaǵan edim. Elbasy Elbasy Nursultan Nazarbaevtyń ótken jyly Qazaqstan halqyna joldaǵan eki Joldaýynda da kólik-logıstıkalyq máseleler tamasha aıtyldy. Bul bizdiń jumysymyzǵa túrtki bolyp, yntalandyra tústi, tez bitirýge asyqtyq», dedi.
Kempıngtiń saltanatty ashylýynda Qarabalyq aýdanynyń ákimi Almas Ysmaǵulov bul kúrdeli logıstıkalyq qurylys tek aýdan ǵana emes, respýblıka ekonomıkasy úshin qosary kóp joba ekenin aıtty.
Názıra Járimbetova.
Derek: egemen.kz.
Cýret: ainanews.kz.