ASTANA. 29 qańtar. Álemge áıgili avstralııalyq jazýshy áıel Kolın Makkaloý 77 jasynda dúnıe saldy. Bul týraly RIA «Novostı» habarlady.
Álem jurtshylyǵy bul jazýshyny eń aldymen «Tikenekte án salýshylar» («Poıýshıe v ternovnıke») romanynyń avtory retinde jaqsy biledi. Atalmysh shyǵarma bestsellerge aınalyp ketkeli qashan!
Jazýshy ómiriniń sońǵy jyldarynda birneshe ret ınfarkt alyp, biraz ýaqytyn múgedek arbasynda ótkizdi.
Kolın Makkaloý 1937 jyly 1 shildede Jańa Zelandııanyń Vellıngton qalasynda (Jańa Ońtústik Ýels) týǵan. Kolınniń anasy Jańa Zelandııa jerinen edi. Onyń ata-babalary arasynda osy aımaqtyń túpkilikti jurty – maorı taıpasynyń ókili de boldy. Makkaloý otbasy Avstralııanyń Sıdneı qalasyna kelip birjola ornyqqansha udaıy kóship-qonýmen júrdi. Osynda jastyq shaǵy ótken Kollın óte kóp oqyp, sýret salýmen aınalysty, arasynda óleń de jazyp turdy. Ol ata-anasynyń yqpalymen medısınany tańdady. Osyǵan baılanysty Sıdneıdegi medısına ýnıversıtetinde oqyp, neıropsıholog mamandyǵyn alyp shyqty. Ýnıversıtetti bitirgesin Avstralııalyń soltústik jaǵalaýyndaǵy Korol aýrýhanasynda jumys istedi. Al 1963 jyly Londonǵa kóship bardy. Makaloý 1967-1976 jyldary Iel ýnıversıteti janyndaǵy Iel medısına mektebiniń neırobıologııa bólimshesinde ǵylymı jáne oqytýshylyq is-áreketpen shuǵyldandy.
Kollın Makkaloý 1974 jyly óziniń «Tım» dep atalatyn tuńǵysh romanyn jarııalady. Taǵy úsh jyldan keıin, ıaǵnı 1977 jyly «Tikenekte án salýshylar» jaryq kórdi. Bul kitap birden halyqaralyq bestsellerge aınaldy. Ol 20-dan astam tilge aýdaryldy. 1983 jyly roman sıýjeti kıno bolyp shyǵaryldy.
Romannyń jelisi 1915 jyldan bastalyp, aldaǵy jarty ǵasyrdy qamtıdy. Oqıǵanyń ortasynda Klırıdiń otbasy júredi. Ol Jańa Zelandııada kedeıshilikte júrgen qalyptarynan Avstralııadaǵy Droheda degen jerde iri pomeshık deńgeıine deıin jetedi.
Jazýshynyń sońǵy romany «Ashy qýanysh» dep ataldy. Ol 2013 jyly jaryqqa shyqty. Jalpy, Makkaloýdyń qalamynan týǵan dúnıeler 25-ten asa kitap bolyp basyldy.
Murat Aıtqoja.
Derek: RIA «Novostı».
Sýret: spletnik.ru.
Aıtqandaı
London ýnıversıtetteriniń birinde júrgizilgen zertteý ár mınýt saıyn álemde «Tikenekte án salýshylar» romanynyń eki danasy satylyp turatynyn anyqtapty.