Elbasy Nursultan Nazarbaevtyń atyna Qurmanǵazy atyndaǵy Qazaq ulttyq konservatorııasynyń stýdenti Rahat-Bı Ábdisaǵynnan hat keldi, dep habarlady Prezıdenttiń baspasóz qyzmeti.
Avtor óz hatynda klassıkalyq mýzykamen kásibı turǵyda aınalysatynyn jáne osy 16 jasyna deıin birqatar shyǵarmalardyń avtorlyq quqyǵyna ıe bolǵanyn aıtady.
R.Ábdisaǵyn Otanyna degen mahabbatyn fortepıano men sımfonııalyq orkestrge arnalǵan «Qazaq rapsodııasy» atty mýzykalyq týyndysy arqyly jetkizgen.
«Onda meniń zamanaýı Qazaqstandy qalaı qabyldaıtynym, onyń qarqyndy damýyn sezinýim kórinis tapqan. Men óz sezimderimdi árkimge túsinikti dybystyq mýzykalyq belgiler arqyly berýge tyrystym», – dep jazady konservatorııa stýdenti.
Avtor qazirgi ýaqytta álemniń túrli halyqtary dástúrleriniń belsendi túrde kirigý úrdisi baıqalyp otyrǵanyna toqtalady.
«Álemdik mádenıette ózgelerdiń arasynda bizdiń elimizdiń, bizdiń halqymyzdyń mádenıetiniń eń jaqsy qyrlary aıqyn kóringeni óte mańyzdy!», – delingen hatta.
Sondaı-aq, eldiń taǵdyry onyń kóshbasshysynyń taǵdyrymen tikeleı baılanysty ekeni de aıtylǵan.
«Bizdiń árqaısymyz, Qazaqstan azamattary, Memleket basshysy jarııalaǵan baǵdarlamany damyta otyryp, ózimiz belsene aralasatyn salada qomaqty úles qosýǵa tıispiz», – dep jazady hat ıesi.
Sońynda R.Ábdisaǵyn Memleket basshysy jarııalaǵan «Qazaqstan-2050» Strategııasy eldiń barsha azamattarynyń atsalysýymen tabysty júzege asyrylatynyna senim bildirgen.