Almaty oblysy 86 myń ga jerin qaıtaryp, aýyl sharýashylyǵy salasyndaǵy tuǵyryn nyǵaıtty. Bul týraly aımaq basshysy Ortalyq kommýnıkasııalar alańynda aıtyp berdi, dep jazady Egemen.kz.
Almaty oblysy Qazaqstannyń agrarlyq sektorynda jetekshi oryndardy ıemdenedi. Odan bólek, jer resýrstaryn utymdy paıdalaný, sút ónimderin qaıta óńdeý kásiporyndaryn qoldaý jáne mal sharýashylyǵyn damytý óńir úshin basym baǵyttardyń biri.
«Paıdalanylmaı jatqan jerlerdi qaıtarý - jaı ǵana mindet emes, bul óńirdiń strategııalyq basymdyǵy. Bul salada qazirdiń ózinde eleýli sharalar qolǵa alynǵan. Anyqtalǵan 399 myń gektar paıdalanylmaı jatqan jerdiń 86 myńy qaıtaryldy, bul Aýyl sharýashylyǵy mınıstrliginiń bekitilgen josparynyń 123 paıyzyn quraıdy», dedi Marat Sultanǵazıev.
Bul jumys, ákimniń aıtýynsha, óńirdiń áleýetin tolyq paıdalanýǵa jáne aýyl sharýashylyǵy salasynyń turaqty ósýin qamtamasyz etýge múmkindik beredi.
О́ńir qus basy boıynsha birinshi, qoı men eshki sany boıynsha úshinshi, iri qara mal sany boıynsha tórtinshi orynda. Oblysta qus etin óndirý 114,3 myń tonnaǵa jetip, respýblıkadaǵy jalpy kólemniń úshten birin quraıdy. Sondaı-aq, oblys agroónerkásip keshenin damytýdy jalǵastyryp, sút jáne jumyrtqa óndirý boıynsha aldyńǵy qatarda.
О́ńirde sút óńdeý salasyn odan ári damytý úshin jalpy quny 15 mlrd teńgeni quraıtyn 13 ınvestısııalyq joba júzege asyrylýda. Bul jobalardyń ishinde 5200 bas asyl tuqymdy iri qara malyn satyp alý ónimdilikti arttyryp, sút sapasyn jaqsartýǵa múmkindik beredi.
«Sút óńdeýdi qoldaý – oblystyń bolashaǵyna ınvestısııa. Biz kásiporyndardyń tolyq júktelýine jaǵdaı jasap jatyrmyz, bul ónim kóleminiń ulǵaıýyna jáne olardyń sapasynyń jaqsarýyna ákeledi», dedi Almaty oblysynyń ákimi.
Ákim oblystyń eksporttyq múmkindikterdi keńeıtýge, sol arqyly uzaq merzimdi perspektıvaǵa aýyl sharýashylyǵy salasynyń turaqty damýyn qamtamasyz etýge nıetti ekenin atap ótti.