Aralas jekpe-jekten AQSh-tyń Las-Vegasynda ótken UFC Fight Night 253 týrnırinde tarıhı sáttiń kýási boldyq. Elimizdiń ókili tuńǵysh ret álemdegi eń beldi promoýshen uıymdastyrǵan jarystyń basty básekesinde óner kórsetti.
Biraz jyldan beri aıshyqty ónerimen óz jankúıerlerin qýantyp júrgen asa jeńil salmaqtaǵy Asý «Zulpyqar» Almabaev syn saǵatta bilgeninen jańyldy. Las-Vegasta 31 jastaǵy qazaq faıteri portýgalııalyq Manel «Juldyzdy jigit» Kapemen kúsh synasty. Kape – kópti kórgen kókjal. Onyń osy sport túrimen aınalysyp júrgenine 13 jylǵa jýyqtady. Kezinde KOC pen Rizin promoýshenderiniń altyn belbeýin ıelengen Angolanyń týmasy barlyǵy 28 jekpe-jek ótkizip, sonyń 21-inde jeńiske jetti. 18 kezdesýin merziminen buryn aıaqtady. Osydan úsh jyldan asa ýaqyt buryn, dál osy shaharda bizdiń Jalǵas Jumaǵulovty nokaýtpen jeńdi.
Qos sańlaqtyń aıqasynda Kapeniń basymdyǵy anyq baıqaldy. Úshinshi raýnda ol Almabaevtyń kózin shuqyp aldy. Biraq tóreshi «eshteńe bolǵan joq» degendeı syńaı tanytyp, jekpe-jekti toqtatqan joq. Pıreneı túbeginen kelgen tarlan osy sátti ońtaıly paıdalanyp, qandasymyzdy tómpeshteı bastady. Araǵa tóreshi túsip, básekeni toqtatty. Sóıtip, «Juldyzdy jigit» jeńiske jetti. Qatarynan 17 kezdesýdi óz paıdasyna sheship, segiz jyl boıy eshkimge des bermegen Asý bul joly jeńilgenin moıyndady. Eger «Zulpyqar» osy básekede basymdyq tanytqanda, chempıondyq ataq úshin aıqasýy ábden múmkin edi. О́kinishke qaraı, Almabaevqa ondaı baq buıyrmady.