Byltyr kóktemde AQSh-tyń Las-Vegas qalasynda asa jeńil salmaqtaǵy Bekzat Almahan UFC-degi tusaýkeser kezdesýin Ýmar Nýrmagomedovke qarsy ótkizdi. Qarsylasy tym azýly bolǵanyna qaramastan, qazaqtyń qaısar ulynyń óneri jaqsy ásker qaldyrdy. Qandasymyz Daǵystannyń týmasyna laıyqty qarsylyq kórsetip qana qoımaı, birinshi raýndta ony sulatyp salýǵa shaq qaldy.
Kópshiliktiń esinde qalǵan bul jekpe-jekke Bekzattyń alańǵa jaraqatpen shyqqanyn bireý bilse, bireý bilmeýi múmkin. Jáne de ony birden tym myqty qarsylasqa qarsy qoıdy. Ýmar – dańqty Nýrmagomedovter áýletiniń múshesi. Sol kúnge deıin ol 16 kezdesýiniń barlyǵynda jeńiske jetti. UFC-ge kelgen bette tórt qarsylasyn sulatyp saldy. Jýyrda ǵana avar ultynyń ókili álemdegi eń beldi promoýshenniń chempıondyq belbeýi úshin grýzııalyq Merab Dvalıshvılımen jekpe-jekke shyǵýy da onyń qandaı deńgeıdegi tulǵa ekenin ańǵartsa kerek. Biraq Almahan odan esh qaımyqqan joq. Ataǵy jer jarǵan Habıbtiń inisimen teń dárejede aıqasyp, óziniń áleýeti zor sportshy ekenin baıqatty. Desek te jeńis Ýmardyń ýysynda ketti.
Sodan beri bir jylǵa jýyq ýaqyt ótse de, Bekzat Almahandy aıqas alańynan kóre almadyq. Sóıtsek, jaraqatymen alysyp álek bolyp júrgen eken. Uzaq ýaqyt boıy em-dom qabyldap, endi ǵana qatarǵa qosyldy. Kúni keshe ǵana Bekzattyń qaıta oktagonǵa shyǵatyny belgili boldy. Ol 11 mamyrda Kanadanyń Monreal qalasynda ótetin UFC 315 týrnırinde óner kórsetedi. Qarsylasy – kanadalyq Bred «Sýpermen» Katona.
33 jastaǵy Bred Kanadada dúnıege kelgenimen, qazirgi kezde Irlandııada turyp jatyr. Ol jastaıynan kúres, boks jáne brazılııalyq djıý-djıtsýmen shuǵyldandy. Aralas jekpe-jektegi mansabyn 2014 jyly bastady. Sol aralyqta 20 kezdesý ótkizip, 16 ret jeńiske jetti. Dýblındegi «SBG Ireland» zalynda atyshýly Konor Makgregormen bir zalda jattyǵatyn «Sýpermen» «The Ultimate Fighter» týrnırinde eki márte top jaryp, UFC-ge qabyldandy. 2021 jylǵy 11 naýryzda Bahreınniń BRAVE promoýsheniniń chempıony atandy.
Bred Katona talaı dúleı kúsh ıelerimen kúsh synasty. 2019 jyly Merab Dvalıshvılımen aıqasqanynyń ózi nege turady. UFC-diń bolashaq chempıonynan upaı sanymen ǵana utyldy. 2021 jyly Úıeńki japyraqtar eliniń ókili Almatyda uıymdastyrylǵan BRAVE týrnırinde reseılik Baır Shtepındi sabap tastaǵanyn kózimiz kórdi. Byltyr «Sýpermen» úsh ret oktagonǵa shyqty. Lýısvıllde Djessı Batlerdi jeńse, Toronto men Las-Vegasta Garret Armfıld pen Jean Masýmotaǵa ese jiberdi. Bul básekelerdiń barlyǵy da aıaǵyna deıin sozylyp, qorytyndy sheshimdi tóreshiler shyǵardy. Mine, endi Katona qazaqtyń uly Bekzat Almahanǵa qarsy shyǵady.