Ǵylym jáne joǵary bilim mınıstrligi Arqalyq pedagogıkalyq ınstıtýtyna ýnıversıtet mártebesin berý týraly sheshim qabyldady, dep habarlaıdy Egemen.kz.
Osyǵan oraı ýnıversıtet oqytýshylaryn, stýdentterin, jalpy óńir turǵyndaryn quttyqtaǵan oblys ákimi Qumar Aqsaqalov:
«Bul – tek Arqalyq úshin ǵana emes, búkil Qostanaı oblysy úshin mańyzdy oqıǵa. Ýnıversıtet mártebesiniń berilýi oqý ornynyń jańa kókjıekterdi baǵyndyrýyna jol ashady. Stýdentter sany artyp, bilim berý baǵdarlamalary keńeıtiledi. Endi bolashaq mamandar tek pedagogıkalyq baǵyttarda ǵana emes, sonymen qatar IT, jýrnalıstıka, ekonomıka, aýyl sharýashylyǵy jáne basqa da mańyzdy salalar boıynsha bilim ala alady», dedi.
Shalǵaı shahardaǵy bilim ordasynyń stýdentteri endi magıstratýra bóliminde bilim alatyn bolady. Keleshekte doktorantýra ashylmaq.
Oblys ákiminiń sózinshe, bul ózgerister óńirdiń ǵylymı áleýetin nyǵaıtyp, suranysqa ıe mamandardy daıarlaýǵa múmkindik beredi. Ýnıversıtette ǵylymı-zertteý jobalary damyp, ınnovasııalyq tehnologııalar ázirlenip, oqytýdyń ozyq ádisteri engiziletin bolady. Jańa mártebe halyqaralyq yntymaqtastyqqa da jol ashady. Ýnıversıtet sheteldik joǵary oqý oryndarymen belsendi túrde baılanys ornatyp, tájirıbe almasyp, ozyq bilim berý baǵdarlamalaryn engizýge jáne stýdentterge akademııalyq utqyrlyq múmkindikterin usynýǵa jaǵdaı jasaıdy.