Jambyl oblysynyń ákimi Erbol Qarashókeev «Áýlıeata – kitap oqıtyn óńir» jobasy aıasynda qolǵa alynǵan «Oı sheberi» zııatkerlik oıynynyń jeńimpazdarymen júzdesti, dep habarlaıdy Egemen.kz
Ulttyq kıim kıgen bilim alýshylardy oblys ákimi apparaty basshysynyń orynbasary Janbolat Nurmoldauly qarsy alyp, óńirdiń bas ǵımaraty týraly túrli derektermen bólisip, oqýshylarǵa ekskýrsııa júrgizdi. Keıinnen óńir basshysy kitapqumar oqýshylarmen kezdesip, zııatkerlik oıynda top jarǵan oqýshylarǵa tolaıym tabys tiledi.
«Kórkem ádebıet – árbirimiz úshin jańa álemniń esigin ashatyn, oı-óristi keńeıtetin, júrekti meıirim shýaǵymen nurlandyratyn qundylyq. Árbir oqylǵan jańa kitap sizderdiń zeıinińizdi asha túsetini anyq. Kitap oqyǵan adam qaı kezde de ozyq oıymen daralanady. Sondyqtan da kitap oqýdy eshqashan toqtatpaı, jańa bıikterdi baǵyndyra berińder», dedi óńir basshysy óz sózinde.
О́z kezeginde bilimmen qarýlanǵan oqýshylar óńir basshysyna rızashylyǵyn jetkizip, bul kezdesý olardyń izdenis izine túsýine serpin beretinin aıtty. Kezdesý barysynda E. Qarashókeev kitapqumar jasóspirimderge arnaıy Alǵys hat jáne Muhtar Áýezovtyń «Abaı joly» roman-epopeıasyn tabystady.
Eske sala keteıik, Jambyl oblysy ákimdigi men «Jambyl oblysy Azamattyq Alıansy» zańdy tulǵalar birlestigi demeýshilerdi tarta otyryp, 18 qańtarda «Oı sheberi» zııatkerlik oıynyn uıymdastyrdy. Oǵan Taraz qalasy men aýdandardan 90 komanda (450 oqýshy) qatysty. Bilim báıgesine qatysýshylarǵa óńirden shyqqan tanymal jazýshylar men aqyndardyń shyǵarmalaryna qatysty suraqtar qoıyldy. Nátıjesinde Baızaq, Merki, Sarysý aýdandarynyń namysyn qorǵaǵan mektep oqýshylary top jardy. Jeńimpaz 3 komandaǵa qarjylaı sertıfıkat tabystalǵan bolatyn.
6 kezeńnen turatyn tartysty básekege qatysýshylardyń arasynda 300 kitap oqyǵan Asqar Nurmahan, aqıyq aqyn Muqaǵalı Maqataevtyń 250 óleńin jatqa biletin Káýsar Qashqynbaı, júzden astam kitaptyń tereńine boılaǵan Nurtileý Satybaldy sekildi jas órender bar.
Jambyl oblysy